Pulis itinumba sa Batangas

MANILA, Philippines — Isang pulis ang tinambangan ng armadong kalalakihang sakay ng motorsiklo nitong kamakalawa ng gabi sa San Juan, Batangas.

Nakilala ang biktimang si Police Officer 1 Jay-R Cartaciano na nakatalaga sa San Juan police station.

Ayon sa ulat, nagmamaneho ng kaniyang sasakyan si Cartaciano nang pagbabarilin ng mga suspek sa Barangay Buhay na Sapa.

Naisugod pa sa San Juan District Hospital ang pulis ngunit hindi na umabot pa nang buhay.

Pinaniniwalaang may kinalaman sa trabaho ni Cartaciano ang motibo sa likod ng krimen.

Bumuo na naman si Batangas police director Senior Superintendent Alden Delvo ng grupo na mag iimbestiga sa pagpatay sa kanilang kasamahan.