Matansero inutas sa birthday party

QUEZON , Philippines  —  Nabahiran ng dugo ang pagdaraos ng birthday party makaraang barilin ang 46-anyos na matansero ng kanyang pinsan sa Sitio Langka, Barangay Concepcion Banahaw sa bayan ng Sariaya, Quezon kamakalawa ng gabi. Hindi na umabot ng buhay sa ospital dahil sa tama ng bala sa kanang tagiliran ang biktimang si Dominador Mayor habang tinutugis naman ng pulisya ang suspek na si Mario Mayor. Ayon sa pulisya, nakikipag-inuman ang dalawa sa iba pa nilang kaanak subalit nang malasing ay nauwi sa mainitang pagtatalo dakong alas-9 ng gabi. Sa gitna ng pagtatalo ay binoga ng suspek ang biktima na sinasasabing lango na sa alak. Pinaghahanap naman ng pulisya ang suspek na nahaharap sa kasong homicide.