3 dedo, 3 grabe sa motorcycle crash

BAYOMBONG, Nueva Vizcaya, Philippines — Tatlo-katao ang namatay sa naganap na magkahiwalay na sakuna sa bayan ng Solano, Nueva Vizcaya  kamakalawa ng gabi. Sa ulat ni Ignacio Layugan Jr., hepe ng Solano police station, kinilala ang mga namatay na sina Daniel Rivera, 2-buwan gulang, ng Purok 6, Barangay San Luis, Solano; Gerald Aquino, 27, security guard;  at ang backrider nitong si Mark Roldan Bautista, 25, kapwa nakatira sa Barangay Bintawan Norte, bayan ng Villaverde. Sakay sa motorsiklo si Danilo Rivera, 28, ng Barangay San Luis at ang kanyang ka-live-in na si Jenny Velasco, 26; anak na si Marian Rivera, 9; at Daniel nang salpukin nito ang pick-up (XJE 679) ni Luke Sarol, 62, ng Banaue, Ifugao sa intersection ng Bintawan Road at Washington Street. Samantala, sumalpok naman ang motorsiklo nina Aquino at Bautista sa puno ng malungay sa Bintawan Road kung saan kapwa namatay habang ginagamot sa Veterans Regional Hospital.