Pinsan ng drug lord utas sa shootout
MANILA, Philippines - Napaslang ang sinasabing pinsan ng drug lord matapos itong na makipagbarilan sa mga tauhan ng pulisya sa Barangay Ermita, Cebu City, Cebu noong Lunes ng umaga.
Kinilala ang napatay na si Rolan Secretaria, pinsan ng drug lord na si Rowen “Tawa” Secretaria.
Sa ulat ni P/Senior Supt. Joel Doria, director ng Cebu City PNP, bandang alas-8 ng umaga nang maganap ang shootout matapos na paputukan ng suspek ang arresting team ng pulisya sa inilatag na drug bust operation sa nasabing lugar.
Sa tala ng pulisya, si Rolan ay isa sa mga pangunahing suspek sa pamamaril at pagpatay sa 14-anyos na estudyante sa Brgy. Pasil noong Sabado kaya nagsagawa ng operasyon ang mga operatiba ng pulisya upang arestuhin ito kahapon pero kumasa kaya napatay.
Nasamsam sa operasyon ang cal. 45 pistol, cal. 28 pistol at 40 piraso ng plastic sachet na shabu.
Samantala, isang oras pagkatapos na mapatay si Rolan, tatlo sa mga kasamahan nitong suspek ang sumuko na sa pulisya na kinilalang sina Gerald Flores, Michael Secretaria at si Daryl Abanto.
- Latest