Kagawad dedo sa pamangkin
MANILA, Philippines – Pa-traydor na sinaksak ng isang 31-anyos na lalaki ang tiyuhin nitong barangay kagawad sa isang sayawan kahapon ng madaling araw sa Brgy.Calacabian, Libacao, Aklan.
Ang biktima na hindi na umabot ng buhay sa Libacao Municipal Hospital sanhi ng malalim na tama ng saksak sa dibdib at balikat ay kinilalang si Louie Nabiong, 44, at residente ng naturang lugar.
Ang suspek na tumakas ay ang pamangkin ng biktima na si Dexter Binuyo, residente ng Brgy. Alas-as, Madalag, Aklan.
Batay sa ulat, dakong alas-3:35 ng madaling araw ay nasa sayawan ang biktima at suspek kaugnay ng pista sa kanilang barangay.
Bigla umanong lumapit ang suspek sa kagawad na nasa likod ng pavement at bumunot ng patalim at sinaksak ang huli.
Nang bumagsak ang biktima ay tumakas ang suspek at sa paunang imbestigasyon ay dating alitan ng kanilang pamilya ang motibo sa krimen.
- Latest
