58 pulis na nahaharap sa iba’t ibang kaso pinasisibak
MANILA, Philippines — Inirekomenda ng PNP-Internal Affairs Service (IAS) ang pagsibak sa serbisyo ng 58 miyembro ng Philippine National Police (PNP) na nasasangkot sa illegal drug trade, extortion, kidnapping at iba pa.
Ito ay kaugnay ng determinadong paglilinis laban sa mga scalawags sa kanilang hanay na ipinag-utos ni PNP Chief P/Director General Ronald “Bato” dela Rosa.
Sinabi ni PNP-IAS Inspector General Alfegar Triambulo na kasalukuyan ay hinihintay na lamang nila na aprubahan ni Dela Rosa ang nasabing rekomendasyon.
Ang karamihan sa mga inirekomendang mapatalsik sa roster ng PNP ay mga miyembro ng Northern Police District (NPD) partikular na mula sa Caloocan City Police na nasangkot sa kontrobersya.
Kabilang sa mga ipinadidismis ay ang mga scalawags cops na nahuli ng Counter Intelligence Task Force (CITF) na sangkot sa kasong extortion at kidnapping. Ang iba naman ay sangkot sa illegal drug trade at iba pang uri ng kriminal na aktibidades.
Magugunita na unang inianunsyo ni Triambulo ang pagdidismis sa serbisyo sa 15 miyembro ng Caloocan City Police kaugnay ng isinagawa ng mga itong kontrobersyal na warrantless raid sa isang bahay sa lungsod noong Setyembre 7.
- Latest