Empleyada ng bangko, ni-rape/sinunog
MANILA, Philippines — Walang awang hinalay at sinunog ang bangkay ng isang dalaga na kawani ng bangko sa isang abandonadong gusali ng isang compound sa Pasig City matapos na siya ay dukutin ng hindi pa kilalang suspek noong Linggo.
Sa naantalang report na nakarating sa tanggapan ni Eastern Police District (EPD) Director P/Chief Supt. Romulo Sapitula, kinilala ang biktima na si Mabel Cama, 22, dalaga, residente ng Ortigas Avenue Extension, Brgy. Rosario ng nasabing lungsod.
Itinuturing ng pulisya na person of interest ang isang Diolan Acebuche, 23 na isang mekaniko.
Batay sa ulat, dakong alas-12:20 ng tanghali noong Linggo nang madiskubre ang sunog at hubad na bangkay ni Cama sa loob ng isang abandonadong gusali na matatagpuan sa compound ng Mega Bus Line Terminal na dating impounding area ng Metro Manila Development Authority (MMDA) na kung saan ay nakatira si Acebuche na ilang metro lamang ang layo naman mula sa bahay ng biktima.
Itinuring ng mga pulis na person of interest si Acebuche matapos na ituro na isang hindi pinangalanang saksi na siyang nakitang nakatayo sa labas ng abandonadong gusali ilang oras bago natagpuan ang bangkay ni Cama.
Sa salaysay ng saksi, patungo na siya sa kanyang barracks dakong alas-10:00 ng gabi noong Sabado nang mamataan si Acebuche na nakatayo sa tapat ng pinto ng abandonadong gusali, na may lumalabas na usok.
Nagsasagawa naman na ng follow-up investigation ang mga otoridad upang matukoy kung sino pa ang posibleng kasabwat ni Acebuche na, batay na rin sa pahayag ng iba pang saksi ay dalawa ang lalaking nakita nilang nakatayo malapit sa bahay ng biktima.
Huling nakita ng mga kapitbahay na buhay si Cama dakong alas-11:00 ng gabi noong Biyernes habang kumakatok sa pintuan ng kanilang tahanan ngunit hindi na ito napagbuksan pa ng pinto.
Hinihintay pa ng mga pulis ang resulta ng otopsiya at genital examination sa biktima.
Bago nadiskubreng patay ang biktima ay hindi nakauwi sa kanilang bahay noong Biyernes ng gabi kaya’t inireport na ito ng kanyang ama sa pulisya na nawawala ito noong Sabado ng umaga.
Ayon sa pulisya, sunog ang kalahati ng katawan ng biktima at hubo’t-hubad na palatandaang ginahasa muna ito bago pinatay sa pamamagitan nang paghampas ng matigas na bagay sa ulo at mukha nito.
- Latest