4 patay sa drug war
MANILA, Philippines - Nasawi ang 4 kalalakihan na umano ay drug pusher nang makipagbarilan sa mga pulis sa magkakahiwalay na anti-illegal drugs operation sa Caloocan City at Tondo, Maynila kamakalawa at kahapon ng madaling araw.
Sa Caloocan City, kinilala ang mga napatay na sina Ranillo Diaz, alyas “Tata”, 29, ng No. 1122 Suha Street, Brgy. 178 Camarin; Jimmy Predas Orata, alyas “Jimmy Taba”, 42, driver, ng No. 158 William Shaw Street, Brgy. 86; at isang alyas “Lauro”, ng Brgy. 176 Bagong Silang.
Batay sa ulat, dakong alas-12:03 ng madaling araw nang mapatay sa anti-drug operations si Orata nang manlaban ito sa mga pulis na aaresto sa kanya at narekober ang isang kalibre .38 baril, P200 na halaga ng marked money, at 4 plastic sachet ng shabu.
Napatay naman dakong ala-1:00 ng madaling araw sa isang bahay sa may No. 5993 Robis, Phase 4 Package 5 Brgy. 176 Bagong Silang ang suspek na si alyas Lauro at alas-4:00 ng hapon naman nang mapatay si Diaz.
Hindi naman umabot ng buhay sa ospital ang umano’y drug pusher na si Ruel Baldesoto, 45, sa isang buy bust operation kahapon ng madaling araw sa Tondo, Maynila.
Sa ulat, dakong ala-1:45 ng madaling araw nang isagawa ang buy bust operation na kung saan ay nakahalata ang suspek na pulis ang katransaksyon nito at nanlaban kaya’t napatay.
- Latest