6 BIFF patay sa engkuwentro
MANILA, Philippines - Patay ang anim na miyembro ng Bangsamoro Islamic Freedom Fighters (BIFF), habang isang miyembro ng CAFGU Active Auxiliary (CAA) at isang sibilyan ang nasawi matapos makasagupa ng tropa ng militar ang mga bandido na umatake kamakalawa sa Pigcawayan, North Cotabato.
Sinabi ni Captain Nap Alcarioto, Spokesman ng Army’s 602nd Infantry Brigade (IB), ang napatay na CAFGU ay nakilalang si CAA Abraham Cutay, 33.
Batay sa ulat, napigilan ang planong pagtake-over ng BIFF members sa CAFGU detachment at BPAT outpost sa mabilis na pagresponde ng tropang gobyerno sa lugar na kung saan ay umaabot ng halos 12 oras ang bakbakan mula alas-6:00 ng umaga kamakalawa hanggang pasado alas-5:00 ng hapon.
Sa kasagsagan ng bakbakan ay anim na BIFF members ang napatay at walo naman ang sugatan ang nakatakas. Tinatayang nasa 200-300 BIFF members ang naghasik ng karahasan sa lugar.
Samantalang isa ring sibilyan na nakilalang si Towan Esmael, 61 anyos na magsasaka ang nasawi matapos na magpaulan ng bala ang mga armadong BIFF.
Naitala naman sa 1,370 evacuees ang nagsilikas mula sa Brgy. Malagkitan, Simsiman, Banucagon at Central Tanasan; pawang sa bayan ng Pigcawayan sa takot na maipit sa bakbakan na ngayo’y kinakanlong sa Pigcawayan National High School.
- Latest