9 pulis, 3 militar napatay sa anti-drug war
MANILA, Philippines – Siyam na pulis at tatlong sundalo ang nagbuwis ng buhay sa giyera ng pamahalaan kontra droga.
Ito ang inihayag ni Philippine National Police (PNP) Chief P/Director General Ronald “Bato” Dela Rosa sa pinaigting na anti-drug operation simula Hulyo 1 hanggang alas-6:00 ng umaga nitong Agosto 23, 2016.
Ayon kay Dela Rosa maging ang mga buhay nila ay nasa panganib sa operasyon kontra droga dahilan may namamatay din sa kanilang panig sa shootout kapag pumalag na ang mga nabubuwang na target na durugistang tulak ng droga.
Sinabi ni Dela Rosa na umaabot na sa 756 mga pinaghihinalaang drug pushers ang nasawi matapos na manlaban sa mga otoridad sa iba’t ibang panig ng bansa simula ng ilunsad ang Oplan Double Barrel o ang pinaigting na anti drug campaign.
Sa nasabing bilang 569 kaso ang isinasailalim sa imbestigasyon ng PNP-Internal Affairs Service sa ilalim ng pamumuno ni Acting Director P/Chief Supt. Leo Angelo Leuterio habang 18 PNP personnel at walong sundalo naman ang nasugatan sa operasyon kontra droga.
Nasa 11 PNP members naman na sangkot sa droga ang napatay sa shootout habang 20 pa ang nasakote sa serye ng operasyon.
- Latest