Chot naghahanap ng kapalit nina Abueva at Almazan sa Gilas

MANILA, Philippines — Sisimulan na ni head coach Chot Reyes ang paghahanap ng kapalit nina Alaska small forward Calvin Abueva at Rain or Shine center Raymond Almazan para sa Gilas Pilipinas.

Ito ay matapos ilag-lag ni Reyes sina Abueva at Almazan sa 15-man national pool dahil sa kabiguan na sumipot sa kanilang once-a-week practice  sa Meralco Gym.

Ang hamstring injury ang idinahilan ng 6-foot-2 na si Abueva, samantalang wala naman sa kanyang tamang kondisyon at pag-iisip ang 6’7 na si Almazan.

Inihahanda ni Reyes ang Nationals para sa pagsabak sa second window ng Asian Qualifiers para sa 2019 FIBA World Cup.

Lalabanan ng Gilas Pilipinas ang Australia sa Pebrero 22 sa Melbourne kasunod ang Japan sa Pebrero 25 sa Mall of Asia Arena sa Pasay City.

Nauna nang pina-luhod ng Nationals ang mga Japanese, 77-71 sa Tokyo, Japan at ang mga Taiwanese, 90-83 sa Smart Araneta Coliseum.

Sa ikatlong ensayo ng Gilas Pilipinas noong Lunes ay hindi uli nagpakita sina Abueva at Almazan.

Wala rin sa ensayo sina Barangay Ginebra wingman Japeth Aguilar, Phoenix shooting guard Matthew Wright at Blackwater star Allein Maliksi.

Ang mga nagpapawis ay sina San Miguel star center June Mar Fajardo, Rain or Shine forward Gabe Norwood, Troy Rosario at RR Pogoy ng TNT Katropa, Jio Jalalon ng Magnolia, Mac Belo ng Blackwater, rookie guard Kiefer Ravena at Kevin Alas ng NLEX.

Sina Jayson Castro ng TNT Katropa at Carl Cruz ng Alaska ay dumating ngunit parehong nakasibilyan.

Ang Gilas Pilipinas team na nagposte ng 2-0 record sa first window ng Asian Qualifiers noong Nobyembre ay sina Fajardo, Aguilar, Abueva, Rosario, Castro, Ravena, Alas, Pogoy, Wright, Maliksi, Norwood at naturalized Andray Blatche.