Cebu Pop Friday; Mabulukong Bunga sa Musika

Name: CERJ GERMUDO

Stage Name: CERJ MICHAEL

Date of Birth: July 18

Place of Birth: Polomolok, South Cotabato

Favorite Singers: OPM Legends: Martin Nievera, Gary Valenciano, Basil Valdez, Ogie Alcasid, etc

Favorite Song: We Are The Reason

Usa ka dakong garbo alang sa usa ka probinsyanong naggikan sa Polomolok, South Cotabato ang mailhan sa nagkadaiyang parte sa nasud ilabi na dinhi sa Sugbo tungod sa linahi nga talento niini sa musika.

Gipamatud- an ni Cerj Germudo nga ang unique talent sa usa ka tawo dinuyugan sa saktong pamatasan ug pakig-uban sa isig katawo maoy makadala nimo sa mga lugar nga dugay na nimong gustong masinati.

Nahimo na usab siya nga suki sa pagsalmot og Cebu Pop ug siya mismo ang mo-interpret sa iyang mga tinagik.

"Daghang highlights sa akong kinabuhi sa kalibutan sa musika tungod kay para sa usa ka probinsyano nga sama nako, nahatagan ko'g talagsaong higayon ug oportunidad nga makasalmot kaniadto sa NAMCYA, Star for A Night , Philippine Idol Cebu Pop ug uban pa. Usa ka dakung oportunidad ug dako kaayo ang akong pasalamat nga naapil ko sa usa ka world class stage play diin naka-perform na mi sa napulo ka nasud sud lang sa upat ka tuig apil na diha ang USA, New Zealand ug ASIA ug sa umaabot nga June kay sa Australia, mao kini ang SIDDHARTHA The Musical."

Namatngonan ni Cerj nga nagtubo siyang naimpluwensyahan sa amahan niining hilig usab sa musika. Hinungdan nga nisalmot siya kaniadto sa NAMCYA (National Music Competition for Young Artists) ug sukad niadto, nagpadayun na siya isip mang-aawit lakip na sa choir, mga nagkadaiyang musical play ug pagka soloist. Sa natad sa paghimo o kun pag -compose og mga awit, gipabuhagay ni Cerj nga nagsugod siya niini sa dihang high school pa lamang siya.

Alang kaniya, nahimo siyang professional songwriter human sa pagtagik niya sa labing unang jingle sa usa ka sikat nga tindahan og cellphones  napulo ka tuig na ang nakalabay.

Sukad niadto, nagsunod sunod na ang iyang paghimo sa mga nagkadaiyang jingles ug una siyang nakasalmot sa songwriting competition niadtong tuig 2013 sa Original Marian Songwriting Festival isip halad niya sa Birheng Maria.

"Para nako ang composer mao ang soul sa kanta samtang ang interpreter mao ang heart. Kinahanglan gyud nga magkasinabot ang composer ug ang interpreter. Sa part sab sa composer, sila ang mas nakahibawo sa emosyon nga gikinahanglang ipagawas sa interpreter o kun singer," suma pa niya.

Dili ikalimod nga naila na gyud si Cerj dinhi sa Sugbo tungod sa mga dagkong pasidungog nga naangkon niini. Sama na lamang sa Cebu Pop kun diin siya ang migawas nga grand champion sa ika 35 nga hugna niini sa Ballad Category sa gi-compose niyang "Salamat Na Lang" diin siya ra sab ang interpreter niini .

Nahimo usab siyang finalist sa 37th Cebu Pop (2017) sa mao gihapong category sa awit niyang "Paso."

Matud ni Cerj nga sa kasagaran niyang mga awit nga gi compose, siya ra sab ang moawit niini ug mapasalamaton siya sa lyricist niya nga si Andro Banate.

Dako ang pasalamat ni Cerj sa kasinatian niya sa Cebu Pop Music Festival sanglit naghatag man kini kaniya og mas daghan pang oportunidad nga makamugna og mga kanta labi na sa mga jingle alang sa mga kompanya ug mga nagkadaiyang produkto nga nanginahanglang i-endorso sa publiko.

Gawas niini, nahimo usab siyang second placer sa labing unang BIBLI-AWIT Liturgical Songwriting Competition sa nakalabay'ng tuig ug finalist usab siya karong tuiga sa 11th Huniño Competition.

Q and A

BNH: Nganong dali ra man ka maka-compose og kanta?

Cerj: Basta inspired ko, malipayon ug wala'y daghang problema ug mapasalamaton ko sa grasya sa Ginoo, usa o duha ka oras mahimo na ang kanta. Para nako naay divine intervention everytime mohimo ko'g kanta.

BNH: Unsa'y imong ika-advice sa mga aspiring composers karon?

Cerj: Ang pag -compose hit or miss na siya. Naay ganahan naa pu'y dili. Ayaw ka discourage kun dili madawat imong kanta sa usa ka songwriting contest. Apil og balik. Ayaw kahadlok og experiment kay basig ang imong style maoy ganahan sa uban nga makapaminaw ana. I-see to it that I offer my songs to my creator. Importante gyud nga i-acknowledge nako sa akong kaugalingon nga gipahuwam ra ni nga talent kanako. I am always grateful. Pananglitan nakahimo ko'g nindot nga tono, magpasalamat gyud dayon ko sa Ginoo nga nakagama ko ana.

BNH: Unsa ang dakong hagit nga imong nasugatan isip usa ka composer?

Cerj: Kanang gitapol ko o wa ko ma-inspired pero kahibawo ko nga kinahanglan ko mohimo og kanta kay naa kay deadline. Panagsa kay makakapoy ug makaluya makigbugno sa imong kaugalingon.

BNH: Sa tanan nimong gi- compose nga mga kanta, unsay nagmarka gyud nimo?

Cerj: Ang "Salamat Na Lang" siguro tungod kay first time nako nga niapil ato og songwriting contest unya nakadaug dayun ko.

 BNH: Unsa ang labing dakong leksyon nga imong nakuha sa imong pagka composer?

Cerj: Ang pag- compose, dili kinahanglang ipaagi lang og kompetisyon labi na ang mga awit nga alang sa Simbahan. Sa pagkatinuod lang, niapil ra ko og Huniño karong tuiga tungod kay gusto ko nga human ani matagaan ko og katungod nga makahimo pa og daghang awit halad para sa balaang bata. (BANAT NEWS)