Rabies free target sa DVMF

CEBU, Philippines - Subsob nga pagpamakuna sa mga iro ug iring ang himuon sa Department of Veterinary Medicine and Fisheries (DVMF) ugmang adlawa Enero 3, sa otsinta ka barangay sa Dakbayan sa Sugbo matud pa ni Dr. Alice Utlang ang pangulo sa nahisgutang buhatan.

Gipahibawo ni Dr. Utlang nga karong adlawa, una nilang bisitahon ang Barangay Bulacao, Inayawan, Sudlon, Capitol Site ug Toong, diin libre nga pagpamakuna ang ilang ihatag ngadto sa mga binuhing iro ug iring.

Sumala pa ni Utlang, niabot na usab sa ilang buhatan ang 50 mil ka doses nga bakuna gikan sa Bureau of Animal Industry (BAI) nga mokabat og P5 milyones.

Awhag ni Utlang sa katawhan nga atol sa schedule sa ilang barangay nga mas maayong dad-on sa mga nanag-iya og iring ug iro ug pabakunahan isip tabang sa siyudad sa pagpa-ubos sa nagkataas nga ihap sa rabies cases.

Panawagan niini sa katawhan nga dili mang-adopt og mga iro gikan sa gawas sa Dakbayan sa Sugbo kun wala pa kini nabakunahan kay kasagaran sa mga iro nga nagka-rabies dili gikan sa Cebu City kay hinatag kini ug gipa-adopt.

Gitug-an ni Utlang nga subsob ang ilang massive vaccination sa kabarangayan tungod sa tinguha nga mahimong rabies free ang dakbayan sa tuig 2018 kay ang siyudad maoy nag-una sa daghang kaso sa rabies sa tibuok rehiyon 7.

Dugang niini nga libre usab ang ilang ipanghatag karon sa kabarangayan, apan kun masayran nila atol sa ilang pagbisita sa kabarangayan nga adunay mga iro ug iring nga wala pabakunahi atol sa schedule ila kining isyuhan og citation ticket. -/DILT (BANAT NEWS)