DILG umaksyon sa awayan ng QCPD at CIDG

MANILA, Philippines - Bumuo na ng independent body si Interior and Local Government (DILG) Secretary Jesse M. Rob­redo para magsiyasat sa gulong kinasasangkutan ng mga tauhan ng Quezon City Police District (QCPD) at ng PNP Criminal Investigation and Detection Group hingil sa umano’y pagdukot sa isang negosyante na nahatulan ng seven counts of estafa na nagkakahalaga ng P5.5 million.

Ayon sa kalihim, ang probe team ay isasagawa ng PNP Office of Internal Security. Sinabi ni Robredo, ang detalye ng kaso ay nakarating sa kanyang atensyon noon pang na­karaang Biyernes, nang ang asawa ng isa sa mga QCPD police ang nag­reklamo sa kanya na ang baril nito ay kinuha ng CIDG at hindi na ibinalik.

Nilinaw ng kalihim na ang pagsi­siyasat ay gagawin para madetermina kung sino sa dalawang grupo ang may pagkakamali, na muntik ng mauwi sa engkwentro.

Inatasan din ng kalihim ang binuong team na magsumite ng rekomendasyon na may katapat na disciplinary actions, kung maaari, laban sa mga tiwaling police officer.

Samantala, inatasan din ni Robredo sina Senior Superintendent Joel Coronel ng CIDG-NCR at Chief Superintendent Mario dela Vega ng QCPD na ipadala nito sa imbestigasyon ang kani-kanilang mga tauhang sangkot sa naturang insidente, kabilang ang mga ulat at pahayag ng mga ito kaugnay sa insidente.

Nag-ugat ang isyu matapos na maaresto ng QCPD ang suspect na si Marilyn Ong, na sangkot sa kasong anti-bouncing Checks Law sa tahanan nito sa Ayala Alabang noong Biyernes ng alas-2 ng hapon.

Ang pag-aresto kay Ong ay nakarating sa impormasyon ng CIDG na pinalalagay na dinukot ito sanhi para rumisponde ang mga huli at awatin ang mga tropa ng QCPD na dahilan para magkaroon ng munting kaguluhan.