Voters reg simula uli sa Nob. 7

MANILA, Philippines – Itinakda na ng Commission on Elections (Come­lec) ang muling pagbubukas ng voters registration sa susunod na buwan para sa barangay at Sangguniang Kabataan (SK) elections.

Batay sa en banc na inilabas ng Comelec, sa November 7 o halos dalawang linggo mula ngayon ang pagre-resume nang pagpaparehistro na tatagal hanggang sa April 29, 2017.

Ayon kay Comelec spokesperson James Jimenez, mas pinalawig nila ang registration upang matiyak ang partisipasyon ng mas maraming botante.

Muling ini-schedule ang registration matapos lumusot sa Senado at Kamara ang panukala na ipagliban ang naturang eleksyon na sinang-ayunan ni Pangulong Duterte.

Dahil dito ay inaasahan ang karagdagang tatlong milyon na magpaparehistro sa barangay election at dalawang milyon naman para sa SK.

Sa isinagawang registration noong Hulyo 15-30 ay nasa 3 milyon na mga botante ang nagpatala.