Kapitan ni Duterte
Dihang gisugo ko sa ABS-CBN News pagkuha sa labing uwahi niyang reaksiyon sa mga awhag pagdagan kapin sa tuig sa wa pang piniliayng presidensiyal, natubag nang Presidente Rodrigo Duterte ang tanang posibleng pangutana.
Sa kapin sa oras namong paabot sa lobby sa iyang giabtang hotel sa Sugbo, kay niadto pa man nga wa motuman og sabot sa oras, niduol namong mga barangay kapitan sa Davao. Ilang pangu nisugyot og pangutana nga iyang gipasalig nga lisod tubagon ni Duterte: "Makaako ba pagpakyas sa katawhan nga nangandoy pagpili niya?"
***
Siya si Barangay Kapitan Mar Masanguid sa R. Castillo sa Agdao District, ang labing unang niawhag ni Duterte pagdagan pagka presidente kapin sa duha ka tuig sa wa pang piniliay. Sa kadaghan na sa nibalitok ug nagpatuong nangampanya parang Duterte, way maka-ilog sa talagsaong papel ni Masanguid.
Apan gibugalbugalan si Masanguid sa iyang awhag. Kay niadtong higayona way nihatag ni Duterte og bisan unsang kahigayonan pagdaog. Iyang pamilya nipahunong niya ug nikumpisal nga nauwaw sa iyang kampanya. Si Duterte mismo nibadlong ni Masanguid ug nihulga pagpusil niya.
***
Sa pagduaw ni Masanguid sa dyAB announcer's booth niadtong Huwebes, 11 ka buwan human sa pagdaog ni Duterte, niinsistir siya nga di nila sinabotan ang nahitabo. Siya mismo nagduda makumbinser ba si Duterte pagdagan.
Dihang pagka mayor inay pagka presidente ang certificate of candidacy nga gisumiter ni Duterte sa COMELEC niadtong Oktubre, nibutyag si Masanguid nga nangita na siya og katagoan kay segurong malumos sa bugalbugal kon di mosanong sa iyang awhag si Duterte.
***
Nagbiyahe si Masanguid paingon sa Saranggani niadtong Nobyembre 27, 2015 dihang nagpiti-piti ang mga tawag ug text sa iyang telepono. Pulos nipahalipay niya. Apan wa siya kahibawo ngano. Sa kabalakang mapasanginlan nga sukwahi sa iyang gipatuo wa diay siya’y kalibotan sa panghunahuna ni Duterte, gipasalamatan niyang tanan sa way pagpangutana unsay hinungdan.
Gidumog siya sa kaubanang barangay kapitan pag-abot sa Saranggani. Dihang natino sa ilang istorya nga nideklarar na pagka presidente si Duterte, nisud si Masanguid sa pansayan. Nihilak sud sa tunga sa oras. Gipakaingon nga nakakita sa langit paghangad sa kisame hangtod nga sa iyang pagduko nakakita sa inuduro.
- Latest
