Nganong kublan sa silot
Kahilas sa mga kompaniya sa telepono nga nitulisok sa lokal nga mga opisyal ug mga molupyo nga maoy hinungdan sa kahinay sa ilang signal di lang sa internet access kon dili hasta na sa pagpalusot sa ordinaryong text messages ug voice calls.
Nakaako uroy ang telcos sa paghan-ok sa pagbasol sa kalangay pagpalapad sa ilang network ngadto sa grabeng burukrasya sa local government units (LGUs) ug kahadlok sa mga molupyo, labi na sa pribadong subdivisions, sa daotang epekto sa pagtukod sa cell sites duol sa kabalayan ug mga sentro sa populasyon.
***
Sa pikas nga bahin, tinuod sab hinuon nga may lokal nga mga opisyal nga nituyo paglangay sa mga transaksiyon, apil nang mga aplikasyon sa telcos, aron pagdugang sa kahigayonan sa pagpangilkil. O pagmatuod lang nga sila ang tinuod nga hawod.
Mahimong tinuod sab nga nagpaundayon ang mga molupyo sa mga patuo nga makamugna og kanser ug grabeng mga sakit ang cell sites ug ubang istruktura sa telekomunikasyon. Kini bisan sa mga pagtuon sa mga eksperto nga nipasalig nga ang cell sites duol sa kabalayan sama ra kaluwas sa pagsaliping sa cellphones sa dunggan sa mga konsumidor.
***
Gani, may nisugyot na nga himuong krimen ang pagbalibad sa pagtukod sa cell sites. Matod ni Kalihim Rodolfo Salalima sa Department of Information and Communications Technology (DICT) angayng silotan ang mga opisyal sa gobyerno ug pribadong mga indibiduwal nga mobabag sa paglambo sa industriya sa telekomunikasyon.
Angayng pahinumdoman si Salalima, nga gawas nga classmate ni Presidente Rodrigo Duterte sa San Beda kanhi abogado sab sa Globe Telecom, nga angayng unahon pagsilot ang mas dakong krimen sa telcos.
***
Mahimong makalusot ang telcos nga hinay’ng ilang signal kay kuwang og cellsites ug mas lisod pagpalibot og mga kable sa nasud nga nabuakbuak sa mga isla, apan di kalihay sa makauuwaw’ng eskandalo nga bisan nasuhito sa ilang limitasyon nagpatuyang gihapon pagpatuo sa minilyon ka subscribers sa serbisyo nga wa silay katakos ni tinguha sa paghatag.
Angayng tarungon ang burukrasya sa LGUs ug tudloan ang katawhan pagpalabi sa siyensiya kay sa tuo-tuo. Apan ang telcos angay sang badlungon, kon kublan man gyod sa silot, sa pagpaburot sa ginansiya bahala nang publiko.
- Latest
