Light trucks, ibabawal na rin sa EDSA
MANILA, Philippines - Simula sa Miyerkules, Marso 15 ipatutupad ng Metropolitan Manila Development Authority (MMDA) ang dry-run para sa pag-ban sa mga lights truck sa kahabaan ng EDSA at Shaw Boulevard, patungong Mandaluyong at Pasig City.
Ito ay matapos aprubahan ng Metro Manila Council (MMC), ang policy making body ng MMDA ang isang resolution para i-ban o huwag padaanin ang mga light truck sa nabanggit na mga major thoroughfares para lumuwag ang daloy ng trapiko dito.
Sa pulong ng MMC na kinabilangan ng mga Metro mayors, binigyan nila ng “go-signal” ang MMDA para magsagawa ng eksperimento o dry-run sa naturang traffic scheme simula sa Marso 15 hanggang Hunyo 15.
Nakasaad sa inaprubahang MMC Re-solution, ang mga truck na may bigat na 4,500 kgs. pababa ay hindi papayagang dumaan ng EDSA at Shaw Boulevard simula alas-6:00 ng umaga hanggang alas-10:00 ng umaga at alas-5:00 ng hapon hanggang alas-10:00 ng gabi.
Ang “uniform light trucks ban” ay ipatutupad mula araw ng Lunes hanggang Sabado, hindi kasama ang Linggo at holiday. Subalit, exempted aniya sa “uniform light trucks ban” ay ang mga light trucks na nagkakarga ng perishable goods, subalit kailangan muna itong mag-apply ng exemption sa MMDA.
Nakasaad pa rin sa resolution, na ang sinuman aniyang lalabag sa naturang regulasyon ay papatawan ng multang P2,000.
Sa bago aniyang traffic scheme, sinabi ni MMDA General Tim Orbos, makakatulong aniya ito para lumuwag ang daloy ng trapiko sa ilang pangunahing lansangan sa Metro Manila.
“This is only one of the several measures that has been approved by the local executives during the meeting in an effort to further improve traffic condition in Metro Manila”, ani Orbos.
- Latest
