P2M multa, 5 yrs. Kulong sa lalabag sa GHW Law

MANILA, Philippines - Sinimulan na kahapon ng Department of Health (DOH) ang paghihigpit sa implementasyon ng Graphic Health Warning (GHW) Law.

Ayon kay Health Secretary Paulyn Jean Ubial, maaring mapatawan ng hanggang P2 milyon multa at pagkabilanggo ng limang taon at pagkansela sa business permit ang sinumang manufacturers at importers na lalabag sa GHW Law habang P100,000 naman ang  multa sa mga retailers.

Sinabi ni Ubial, dapat ang lahat ng produktong tobacco ay may nakatatak na GHW na nagpapakita ng masamang epekto sa katawan ng paninigarilyo at dapat sakop nito ang 50% ng kabuuang display sa harap at likuran ng ‘kaha’ ng sigarilyo.

Kabilang na sa GHW ang pagkakaroon ng throat cancer, stroke, emphysema, impotence, hand/foot gangrene at mababang timbang at wala sa hustong buwan nang panganganak ng babae kung saan ang warning ay isusulat sa Tagalog sa harapang bahagi ng kaha at Ingles naman sa likurang bahagi.

Umapela rin si Ubial sa mga retailers na iwasan ang magbenta ng kada piraso ng sigarilyo.

Inaasahan din na dahil sa istriktong implementasyon ng batas maraming Filipino ang magdadalawang isip nang manigarilyo o ‘di kaya ay mas pipiliin nila na huminto na sa paninigarilyo.

Nauna nang niratipikahan ang GHW Law noong Hulyo 2014, pero ngayon lamang nagkaroon ng istriktong implementasyon ang DOH.