470 seniors sa Mandaue nakadawat og pension

CEBU, Philippines - Gihatag na kagahapon ang ikatulong hugna sa pagpanghatag sa P1,500 nga social pension gikan sa Department of Social Welfare and Development kon DSWD-7 ngadto sa mga piniling senior citizens sa dakbayan sa Mandaue

Sa kapin 20 mil ka senior citizens sa Mandaue, 470 lang niini ang nahimong napilian sa DSWD-7 ug Federation of Senior Citizens sa Mandaue alang sa social pension.

Matud ni Michael Pielago, focal person sa mga senior citizens sa dakbayan nga gipili gyud gikan sa 27 ka barangay ang maong 470 ka beneficiaries ug gihashasan kini pag-ayo aron kadtong mga kabus ra ang mahatagan.

Ang maong mga beneficiaries makadawat usab sa P6 mil nga financial assistance gikan sa lokal nga kagamhanan sa Mandaue matag tuig.

Mapasalamaton si Raul “Pokang” Cabahug, ang presidente sa Federation of Senior Citizens sa Mandaue nga nakadawat na usab ang iyang mga kauban.

Nanghinaot sila nga mapaumentohan ni Mayor Luigi Quisumbing ang madawat nga financial assistance alang kanila matag tuig aron mas magmalipayon ang nahabilin nilang katuigan sa ilang kinabuhi. (BANAT NEWS)