Sayyaf sub-leader, 10 pa sumuko
MANILA, Philippines - Sumuko sa tropa ng AFP Joint Task Force (JTF) Basilan ang notoryus na sub-leader ng Abu Sayyaf Group at sampu pa nitong tauhan kabilang ang 12-anyos na batang lalaki sa Basilan kahapon ng umaga.
Ayon kay Major Filemon Tan Jr., spokesman ng AFP – Western Mindanao Command, dakong alas-10 ng umaga nang sumuko kay JTF Basilan at 104th Brigade Commander Col. Cirilito Donato ang mga bandidong Abu Sayyaf.
Sumuko ang 11 bandido matapos ang negosasyon nina Basilan Gov. Jim Sallliman Hataman at Mayor Gulam Salliman.
Kinilala ni Tan ang sumukong sub–leader ng Sayyaf na si Moton Indama, pamangkin ni Abu Sayyaf Basilan Commander Furuji Indama at sampu nitong tauhan.
Kabilang naman sa mga nagsisuko nitong tauhan ay sina Moton Indama, Haimin Jalil, Marham Musana, Sadjara Hadjaraman, Tari and Halid Murasimin, Gulam Hajim, Haraward Sahirulla, Basri Laisun, Nasim Baliyung at si Ring Langka.
Nasamsam ang mga armas kabilang ang tatlong cal. 45 pistol, cal. 38 handgun, M653 rifle, mini sub at machine gun, M203 rifle grenade, M1 Garand, 12 gauge shotgun at mga bala gayundin ang mga magazine.
Umaabot na sa 34 Abu Sayyaf ang sumuko sa tropa ng military simula noong Hulyo hangang Oktubre 24.
- Latest
