Paglikoy sa cha-cha
Sa usa sa iyang mga pagduaw sa Sugbo, gipahibawo ni House Speaker Pantaleon Alvarez nga kapin sa gatos ka balaudnon nga ilang napasar dayong tapos sa niaging tuig padayon nga natanggong tungod sa kalangayan sa mga senador.
Mao ni sukaranan sa iyang pagbugalbugal og tawag sa Senado nga "mabagal na kapulongan" ug pagdayeg sa House nga "masipag na kapulongan." Mao sab ni usa sa argumento nga iyang gigamit pag-insistir nga mahimo ra nila nga usbon ang 1987 Constitution bisan pa og di moapil ang Senado sa ipahigayon nga constituent assembly.
* * *
Ang makabungog nga mayoriya ni Presidente Rodrigo Duterte sa House of Representatives (pito ra sa 297 ka kongresista ang klaro nga naa sa oposisyon) ug ang kataas sa iyang popularidad sa katawhang Pilipinhon mahimo nga nakapadasig ni Alvarez pagduso sa iyang kaugalingon nga hubad sa batakang balaod.
Nga makahimo ang mga kongresista pagsugyot og kausaban sa konstitusyon bisan wa'y motunga nga bisan usa ka senador. Masaligon si Alvarez nga makakuha og ¾ nga mayoriya (nagkinahanglan lang siya og 240 ka boto sa 297 ka kongresista ug 23 ka senador).
* * *
Inay tulisukon ang Sugbuanon nga si kanhi chief justice Hilario Davide Jr. sa Korte Suprema ug uban nga nagpanday sa 1987 Constitution, angay tingali nga tahuron ni Alvarez ang tinuod nga katuyoan sa mga probisyon nga gihimong sukaranan sa iyang panglaktod.
Salikwaot nga samtang magkinahanglan ang House sa pagdason sa Senado sa di pa makausab sa ngan sa kadalanan ug mga eskuylahan, magbuot-buot lang ang mga kongresista sa pag-usab sa batakan nga balaod.
* * *
Niang pipila sa mga balaudnon sa House nga wa'y labot ang ubang bahin sa nasud apan kinahanglan pa nga dasonan sa Senado: Paghingan sa Laoag by-pass road isip Rodolfo G. Fariñas Jr. Highway; pagtukod og special economic zone ug free port sa munisipyo sa Mansalay, Oriental Mindoro;
Paghimo sa Pinamalayan, Oriental Mindoro nga regional center sa MIMAROPA; paghimong dakbayan sa lungsod sa Daraga, Albay; pagdeklarar sa Abril 3 ug Septiyembre 2 nga holidays sa Albay; pagtukod og buwag nga city schools division sa Dakbayan sa Victorias sa Negros Occidental; ug paghimo sa Cotabato City nga buwag nga distrito gikan sa Maguindanao.
- Latest
