Pagsuway ug milagro sa panahon
Pipila ka takna sa wa pa ang Traslacion, gipahibawo ko ni PAGASA Visayas Director Oscar Tabada sa di maayo nga mga timaan sa daotan nga panahon nga nakit-an sa ilang kahimanan: Baga nga dag-om ang nagsingabot sa Sugbo ug kasilinganan nga mga lalawigan.
Nabalaka si Tabada nga mameligro sa baha ug dahili sa yuta ang Metro Cebu tungod sa wa'y hunong nga pag-uwan. Naguol sab siya nga mahasol sa mas kusog nga bunok sa uwan ang paggikan sa mga imahen sa Sr. Sto. Niño ug Birhen sa Guadalupe sa Basilica Minore del Sto. Niño.
***
Tuod man, pagmata nako gahapon sa kadlawon nagbunok ang uwan. Gihulagway ni Rhea Soco, nga mao'y nag-cover sa Walk with Mary alang sa dyAB Radyo Patrol, nga nangabasa ang mga deboto nga nagprosesyon gikan sa Fuente Osmeña paingon sa Basilica bisan pulos nagda og mga payong.
Bisan sa kabasa ug katugnaw, wa motalaw ang mga deboto. Gani, gihulagway sa kapolisan nga mas daghan ang nanguyog sa prosesyon gahapon kon itandi sa 80,000 sa Walk with Jesus sa pagsugod sa nobenaryo sa Huwebes sa niagi nga semana.
***
Apan sa pagkahuman g'yud sa Misa de Traslacion, sa kalamboan nga lisod ipatin-aw sa lapad nga kasinatian ni Direktor Tabada ug sa labing bag-o nga kahimanan sa PAGASA, nikalit lang og tuang ang uwan, nihunong ang huros sa hangin ug nipakita ang adlaw.
Di ni ang unang higayon nga nabaraw ang dagko nga hulga sa kahimtang sa panahon sa Piyesta Senyor. Mga deboto puno sa mga sugilanon sa nangagi nga mga bagyo nga kalit nga nahilis ug natunaw.
***
Nakakuyog ko sa fluvial procession pila na ka tuig ang nilabay nga gihulga sab og bagyo ug gipasidan-an sa kahigayonan nga makanselar kon mapaubos ang Sugbo sa public storm warning signal. Apan dayon nga sugod sa prosesyon, nilinaw ang dagat.
Busa nahinayon ang prosesyon bisan nagsige pa ang bunok sa uwan. Apan diha nga nanunga-tunga na ang prosesyon, nikalit lang og iway ang itom nga mga panganod, nisihag ang kalunsay sa asul nga langit, nibathay ang pahiyom sa adlaw ug nabantang ang di lang usa kon dili duha g'yud ka bangaw.
- Latest
