Pagduhiraw ni Duterte
Usa sa mga sugilanon nga gibalikbalik ni Presidente Rodrigo Duterte sa iyang mga diskurso, nga nahimong mas makahuloganon ning bisperas sa ika-45 nga sumad sa pagdeklarar ni kanhi presidente Ferdinand Marcos og martial law, mao ang iyang gihulagway nga espesyal nga relasyon sa iyang amahan ug ni Marcos.
Nga maoy iyang gitumbok nga hinungdan nga di siya makatalikod sa mga Marcos karon. Andam siyang mobakwi sa mga kaso batok nila bugti sa pag-uli sa kabahin sa kinawat nila’ng katigayonan human niya gitugotan nga ilubong ang patayng lawas ni Marcos sa Libingan ng mga Bayani.
***
Gihinumdoman ni Duterte ang matinud-anon nga paglaban sa iyang amahan nga si Vicente Duterte ni kanhi Presidente Marcos: "Ang akong amahan usa sa duha nga nagpabilin uban ni Marcos sa labing ngitngit niya nga mga takna. Ang tanan nibalitok na ngadto sa Liberal Party (LP) niadtong higayona, ni (anhing Presidente Diosdado) Macapagal, ug sila rang (kanhi Zamboanga del Sur Governor Bienvenido) Ebarle ug ang akong amahan ang nibarug uban ni Marcos.
"Mao nga dihang nidaog si Marcos, ang akong amahan ang usa sa mga sakop sa iyang gabinete. Mao na nga di gyod kong kabuwag sa mga Marcos."
***
Apan sama sa ubang sugilanon ni Duterte, lahi ang aktuwal nga panghitabo. Si Marcos isip batan-ong senador nga sakop sa LP ni Macapagal maoy pangu sa gamhanan nga Finance Committee sa Senado ug maoy tigduso sa tinuig nga nasudnong budget.
Di si Marcos maoy gibiyaan. Siya ang nibiya sa LP, nibalitok sa Nacionalista Party (NP) ug nipilde ni Macapagal sa piniliay’ng presidensiyal sa 1965.
***
Si Duterte nagpili ra sab sa mga butang nga iyang mahinumdoman. Ang maayo rang mga aspeto sa martial law, diktadura ug sa mga Marcos ang iyang gihisgutan. Di managana paglubag sa kasaysayan aron pagpahaom sa iyang kaugalingong panglantaw.
Sayon rang gikalimtan nga iyang inahan nga si Soledad Roa maoy nangu sa taga Davao pagbatok sa diktadurang Marcos, nga si kanhi Presidente Cory Aquino ang nagtudlo niya pagka mayor sa Davao City ug nga usa sa labing suod niya karong alyado anak ni Macapagal, nga sa iyang pagduhiraw maoy nagbudhi ni Marcos ug sa iyang amahan.
- Latest
