Pacquiao-Horn fight sa Australia wala nang balakid
MANILA, Philippines - Wala nang anumang hadlang para sa bakbakan nina Filipino boxing superstar Manny Pacquiao at Australian contender Jeff Horn.
Mismong ang pinuno ng Queensland Government ang opisyal na naghayag ng bakbakan nina Pacquiao at Horn sa Hulyo 2 sa 55-seater na Suncorp Stadium sa Brisbane, Australia.
“After months of speculation, I am pleased to say we’re finally all in the ring for this fight to go ahead,” wika kahapon ni Queensland state Premier Annastacia Palaszczuk.
Nauna nang inihayag ni Bob Arum ng Top Rank Promotions ang pagpirma ng 38-anyos na si Pacquiao (59-6-2, 38 KOs) sa fight contract para labanan ang 29-anyos na si (16-0-1, 11 KOs).
Itataya ni Pacquiao ang kanyang suot na World Boxing Organization welterweight crown laban kay Horn, dating school teacher.
“Up to 55,000 boxing fans from across Australia and the world are expected to fill Suncorp Stadium (in Brisbane) to see the local teacher taking on one of the biggest names in boxing history, on his home turf,” wika ni Palaszczuk.
Inilarawan ng Duco Events, ang promoter ni Horn, ang naturang laban na isang “once in a lifetime event and a rare opportunity to host a fight outside the US and Europe,” sabi ng Duco Events sa kanilang statement.
Bago balikan si Horn ay nahikayat si Michael Koncz, ang Canadian business adviser ni Pacquiao, na kausapin ang isang investment group sa United Arab Emirates na nangako ng premyong $38 milyon kay ‘Pacman’ para labanan si dating British world light welterweight king Amir Khan (31-4-0, 19 KOs) sa Dubai.
Subalit nabigo ang UAE group na maipakita ang pera sa grupo ni Pacquiao kaya muling tinanggap ang alok ng tropa ni Horn.
- Latest