Ang mga bisita nga mitambong sa Prisohan sa Cordova nangalisbo sa kabaho

CEBU, Philippines - Nangalisbo sa kabaho ang Cordova Police Station tungod sa pag-awas sa pansayan sa ilang detention cell.

Ang maintenance department sa munisipyo sa Lungsod sa Cordova gipahibalo na sa maong suliran ug kasamtangang gipaabot nga hatagan na kini og pagtagad.

Ang nasinating pagpangalisbo sa baho gikan sa miawas nga pansayan maoy dugang suliran nga gisagubang karon sa kuwerpo sa kapolisan sa maong lungsod diin gumikan kini sa naghuot nga mga binilanggo.

Si PO2 Vilma Degamo sa maong estasyonan miingon nga pipila ka mga binilanggo ang magsukasuka ug maglisod na sa pagginhawa  ilabi na ang mga babaye nga natanggong sab sa ilang detention cell.

Nasayran nga ang kapasidad sa maong prisohan anaa  lang sa 20 ka tawo ug napulo usab ang alang sa mga babaye. Apan karon, 65 ka lalaki ug 11 ka babaye ang napriso diin kadaghanan kanila nadakpan tungod sa pagpamaligya og  ilegal nga drugas.

Matud ni PO2 Degamo nga angay na untang ipadala ang ilang mga priso sa Cebu Provincial Detention and Rehabilitation Center (CPDRC) apan dili na modawat og dugang inmate ang maong pasilidad kay nagsugwak na usab kini sa mga binilanggo. (BANAT NEWS)