Daghang basura nakolekta gigantihan

CEBU, Philippines - Nakadawat og P100,000 ang Cogon Elementary School gikan sa Rotary Club of Cebu Naga Central human sila ang nakakolekta og labing daghang basura nga plastic.

Si Atty. Annave Lapitan, pangulo sa maong grupo, nibutyag nga usa ka independente ang ilang organisasyon nga andam motabang sa lokal nga kagamhanan.

Naumol ang grupo sa niaging tuig ug nihimo dayon og kalihukan nga giporsige sa Siyudad sa Naga nga gipangulohan ni Mayor Kristine Vannessa Chiong.

Ilang gimugna ang kompetisyon sa padaghanay sa makolekta nga basura sa 26  ka tunghaan sa elementarya.

Kini maoy usa sa mga pamaagi nga motuhop sa huna-huna sa kabataan ang kabililhon sa kalimpyo sa lugar ingon man naa sa basura makita ang kwarta kun mokugi lang.

Ang Cogon Elementary School nakakolekta og 2,400 kilos nga plastic.

Si Chiong nihingusog sa pagpatuman sa “no segregation, no collection” policy.

Gawas sa maong programa nihimo sab og medical mission ang grupo ni Lapitan ingon man programa sa pakigbatok sa mga lamok nga nagdala sa makamatay nga sakit nga dengue.

Adunay 25 ka sakop ang organisasyon nga andam motabang sa kalihukan sa siyudad.

Sa niaging semana pormal nga gipakita sa publiko ang ilang marker kilid sa karsada nga ang ilang grupo nagsuporta sa siyudad. (BANAT NEWS)