Pagsubli sa hinabang sa US
Niang kabahin sa mga pamahayag nilang Senador Patrick Leahy sa Vermont ug Senador Benjamin Cardin sa Maryland mahitungod sa Pilipinas sa hawanan sa Amerikanhong Senado niadtong Septiyembre 26 karong tuiga:
Sen. Leahy: Mr. President, kapin sa 3,000 ang nangamatay sa Pilipinas sa kampanya ni Presidente Duterte batok sa drugas. Isip tsirman sa Senate Appropritations subcommittee nga nagpundo sa US foreign assistance programs, nahimangod kong wa ta makat-on. Ang ekonomikanhong kahigayonan ug seguridad di makapasalig og kahapsay. Gikinahanglan ang lehitimong gobyerno ug pagpanalipod sa tawhanong katungod. Isip kanhi prosecutor ug karon sakop sa Judiciary Committee, nahibawo ko nga kon tugotan sa gobyerno ang laktod nga pagpamatay, mosunod ang kaguliyang. Alang sa gibanabanang 700,000 ka durugista sa Pilipinas, ang kahadlok nga patyon nakaaghat nila pagsurender. Apan tungod sa kanihit sa rehabilitation centers, gipasaad lang nga di na magbisyo, o gibalhog sa naghuot nga prisohan. Giusikan ni Duterte ang kahigayonan pagtabang sa kaliboan paglingkawas sa drugas. Way pagpamatay nga makatarung sa mga hukmanan o makatabang sa mga biktima sa drugas. Sa makapabalakang timaan, gitangtang isip pangu sa Senate Justice Committee ang senador nga nagsusi sa mga pangabuso. Gipulihan sa senador nga pabor sa pagpanakop nga way warrant.
Sen. Cardin: Ang 70 anyos nang relasyon sa Estados Unidos ug Pilipinas mahinungdanon. Apan nahadlok kong ang binuhatan ni Presidente Duterte mosangpot sa panagsungi. Kon magpadayong pagpamatay, makapaabot ta og kapin sa 6,000 nga maigo sa extrajudicial killings karong tuiga. Di ni sipyat, tinuyo gyod, bangis nga paglapas sa balaod. Nakasabot ko sa tinguha ni Presidente Duterte pagbadlong sa drugas. Apan ang iyang pag-awhag sa lapad nga pagpamatay dakong sayop. Makabuong sa kauyonan sa US ug Pilipinas pagpalambo sa demokrasya. Makahasol sang iyang plano pagbanhaw sa kakostablehan nga maoy labing abusado sa rehimeng Marcos.
Sen. Leahy: Gikinahanglan ang tukmang lakang sa US. Gisuwat nako ang Leahy Law aron pagsegurong ang US di molingiw sa mga pagpangyatak sa tawhanong katungod sa mga nagdawat sa atong hinabang ug pagdasig sa kanasuran pagsilot sa mga responsable. Apan kon magdumili si Duterte pag-imbestigar sa mga abuso, mas dako ang problema nga di masulbad pinaagi sa pagpugong sa hinabang. Angay na tang mopahamtang ug mga kundisyon sa hinabang sa administrasyong Duterte. Motabang ang State Department pag-umol sa atong hukom sa budget sa 2017. Kasagaran mapugos ta og pili tali sa tawhanong katungod ug nasudnong seguridad. Apan di ta mahimong makigkonsabo sa mga abuso sa way pagdaot sa atong pagpalambo sa seguridad sa rehiyon. Ang Pilipinas di makabatok sa terorismo o magpaka aron ingnon nga lehitimong tagduma pinaagi sa pagluba sa inosenteng katawhan. Di perpekto ang US. Pakyas ang atong kampanya batok sa drugas. Apan di nato suportahan ang mga nigamit og sobrang puwersa inay pagpatigbabaw sa balaod.
- Latest
