Pagpangaplay ni Duterte

Dul-an nang usa kabuwan human nakabanos sa Malakanyang si Presidente Rodrigo Duterte, nagpabiling taas ang linya sa mga aplikante sa nagkalainlaing buhatan sa iyang pamunoan. Kasagaran nila nangangkon nga dako og natabang sa talagsaong kampanya ni Duterte nga nakapadaog niya niadtong Mayo 9. Kasagaran nila nabawo sab ug hangtod karon nagpaabot pa og tubag sa ilang mga aplikasyon.

Ang labing mahinungdanong mga puwesto sa administrasyon gitugyan ni Duterte ngadto sa iyang mga kaila nga labi niyang gisaligan. Mao nga kun di ka taga Davao, San Beda College nisakop sa iyang fraternity, ang Lex Talionis Fraternitas, Inc., may nakahunghong nako og giya unsaon nga matudlo ni Duterte.

* * *

Segun sa mga suod ni Duterte siya ang matang sa lider nga nagtuo nga ang labing epektibong paagi sa pagpahilom sa iyang mga kaatbang mao ang pagtahas nila pagsulbad sa problema nga gisigehan nila og saway. Mao nga iyang gitudlo sa gabinete ang mga walhon ug bisan ang iyang mga kaatbang sa politika.

Subling gipasundayag ni Duterte kining matang sa liderato human nisibaw ang mga pagsaway sa sunudsunod nga patay sa agresibong kampanya sa ilegal nga drugas. Gipahibawo niyang asa mosunod nga mga adlaw iyang itudlo ang labing sabaan nga anti crime ug human rights advocates nga mao nay mga tagduma sa kampanya batok sa kriminalidad.

* * *

Mao nga kun ganahan kang madugangan ang kahigayonan nga makatrabaho sa administrasyong Duterte, ayaw pangangkon nga bilib kaayo ug dako ka og natabang niya, kay masaypang mamuyboy ug makasab-an hinuon.

Kun kahatagan og higayon nga makasulti ni Duterte o sa iyang mga sinaligan, mas maayong mopresentar og dagkong problema nga giatubang sa nasud ug motanyag og mga sulbad. Apan utokan ug lapad ang kasinatian ni Duterte sa pagduma sa Davao City nga di siya mahimong ilaron og lunlon nga pagarpar. Hinaot nga ang aplikante naka tugkad gyud sa mga gamot sa problema ug nagtuon gyud sa isugyot nga mga sulbad.

* * *

Ang pagtudlo ni Duterte sa mga sabaan ug bisan sa iyang mga kaatbang mahimong nanukad sa iyang tinguha paghatag og kahigayonan sa labing mamugnaon nga mga ideya unsaon paghaw-as ang nasud gikan sa katimawa, pangurakot ug kriminalidad. Apan mahimo sang bunga sa kahinog sa iyang panglantaw sa politika.

Kun molampos ang mga sabaan ug kaatbang nga iyang gitudlo, maangkon gihapon ni Duterte ang kredito. Kun mabulilyaso sila, sayon ra para ni Duterte ang pagtangtang nila. Mawad-an pa gyud sa kaligdong pagpanaway sa iyang pamunoan kay napamatud-an na man nga way nahimo bisan sa talagsaong kahigayonan nga gihatag ni Duterte nila. Ug ang nagpatudlo nga mga kaatbang sa politika magusbat ug busa wa nay katakos pagbatok niya ug sa iyang mga alyado.