Kainutil sa kakabos
Pagsulbad sa kakabos maoy usa sa mga pasalig sa hapit tanang magpapili sa labing tag-as nga katungdanan sa nasudnon ug lokal nga kagamhanan sa piniliay sa Mayo 9 karong tuiga. Samang pasalig ang giluwatan sa mga nanagan sa nangaging mga piniliay. Nganong nagpabilin mang kabos ang kinabag-an sa katawhan?
Tinuod ba ang naandan nga bugalbugal sa mga kabos nga tapolan ang kasagaran nila mao nga wa gyod mahaw-as gikan sa katimawa? Napakyas ba ang mga politiko nga napili sa katungdanan pagtuman sa ilang mga saad pagpalambo sa nasud ug sa katawhan? O sayop ang ilang gisugyot nga mga sulbad maong nagpabilin ang lapad nga kakabos?
***
Lakbitan lang natong mga saad batok sa kakabos sa mga magpapili pagka presidente:
Si Bise Presidente Jejomar Binay mouna pagsulbad sa kakabos ug pagpalapad sa ekonomiya pinaagi sa pag-usab sa konstitusyon aron katugotang mga langyaw pagpanag-iya og yuta;
Si kanhi Interior Secretary Mar Roxas mopadayon sa “Daang Matuwid” nga naglakip sa kampanya batok sa pangurakot aron way magkalisudlisod;
Si Senador Grace Poe mosulbad sa kagutom pinaagi sa paggahin og dugang kuwarta alang sa mga mag-uuma, kabataan ug ubang naapiking mga sektor aron way usang mabiyaan;
Si Davao City Mayor Rodrigo Duterte mobitay sa mga kawatan sa gobyerno ug mga kriminal, mobasura sa kontraktuwalisasyon ug ubang mga lagda batok sa mga mamumuo ug mohupot sa federalismo; ug
Si Senador Miriam Defensor Santiago, nga niangkong naayo na sa iyang kanser, mosentro sa kampanya batok sa tinuod nga kanser sa kakabos ug pangurakot.
***
Way bag-o sa ilang mga sulti. Napatuman na ang tanang programa. Gawas lang sa charter change (cha-cha) ni Binay ug federalismo ni Duterte. Nga gisalikway na sa kinabag-an sa katawhan sa nangaging mga higayon:
Kusganon nilang gisupak ang cha-cha nga gisuwayan pagduso nilang kanhi Presidente Fidel Ramos, kanhi Presidente Joseph Estrada ug kanhi Presidente Gloria Macapagal-Arroyo; ug
Nikagar ang federalismo nga giduso ni kanhi Cebu Governor Lito Osmeña dihang napilde siya pagka presidente niadtong 1998.
***
Makapabalaka ang kakuwang og lab-as nga ideya pagsulbad sa kakabos sa nakabuylo nang kampanya sa nasudnong piniliay. Angayng maalarma ang kinabag-an sa katawhan nga ang karaang mga sulbad nga pulos napakyas pagpapas sa katimawa mao lang gihapoy gipasalig sa mga nitanyag pagduma sa nasud sa mosunod nga unom ka tuig.
May usa ka tawo nga nahibawo, kay nakasinati na sa makadaghan uyamot nga higayon, nga mobukol ang iyang ulo kon iyang pukpukon sa martilyo. Apan padayon siyang nipukpok sa iyang ulo ug nagpaabot og lahi nga resulta. Wa ba lang tay laing kapilian sa mga nidani sa atong mga boto? O wa tay kalainan sa tawo nga ganahang magsige og martilyo sa iyang ulo?
- Latest
