Pahumot sa katawhan
Bisan siyam ka buwan gikan karon nga ipahigayon ang piniliay’ng presidensiyal, tanang postura ug pamahayag sa mga managan ug sa ilang mga tigpaluyo pulos na sinukod aron pagdani sa suporta sa kinabag-an sa mga botante. Manginlabot na silang tanan sa labing dagkong kontrobersiya ug ang ilang baruganan pulos gitumong pagpalambo sa mga imahe nga ganahan nilang mahinumdoman sa katawhan sa ilang pagpanon sa mga presinto sa Mayo 9 sunod tuig.
May mga kontrobersiya nga makapasamot sa ilang panagsungi. Apan may mga kontrobersiya sab nga makapugos pag-usab sa orihinal nilang mga baruganan aron lang makasakay sa sibaw nga sentimento sa kinabag-an.
***
Sama sa kontrobersiya sa balikbayan boxes. Nga gisugniban sa deklarasyon ni Customs Commissioner Alberto Lina nga hugot niyang ipatuman ang balaod sa random nga pag-abli sa mga kahon pagseguro nga di sila kalutsan sa smugglers. Tungod sa ka-emosyonal sa isyu alang sa minilyon ka pamilya nga nagsalig sa Overseas Filipino Workers, nilayat dayon pagtunglo ni Lina ang mga politiko.
Labihan kalapad sa kasuko batok sa plano ni Lina nga bisan si Presidente Noynoy Aquino napugos pag-usab sa iyang orihinal nga baruganan pagsuporta sa random inspection. Gimandoan niya si Lina nga igo na lang ipaubos sa x-ray examination ang tanang balikbayan boxes ug ang mga kadudahan ra ang ablihan.
***
Nabahin sang baruganan sa mga politiko sa protesta nga gilusad sa Iglesia ni Cristo batok ni Justice Secretary Leila de Lima. Tungod sa iyang pag-atiman sa kasong kriminal nga gipasaka sa kanhi tigpamaba sa INC nga si Isaias Samson Jr. batok sa mga ministro sa Sanggunian nga gipasanginlang ilegal nga nitanggong sa tibuok niyang pamilya sud sa siyam ka adlaw. Gusto sa kadagkoan sa INC nga unahon ni de Lima pagpasaka ang mga kaso batok sa mga mamumuno sa 44 ka SAF commandos nga nangamatay sa engkuwentro sa Mamasapano, Maguindanao.
Human sa pila ka adlaw nga pagpaniid, diriyot magkadungan silang Bise Presidente Jejomar Binay ug Senador Grace Poe sa paghulagway sa mga protesta nga lehitimong lakang sa INC pagpanalipod sa ilang pagtuo. Sa pikas nga bahin, gipanalipdan sa Malakanyang si de Lima nga igo lang nagtuman sa iyang trabaho.
***
Bisan gidudahan nang katakos sa INC pagpadaog og nasudnong mga kandidato, nanghinaot silang Binay ug Poe nga silay bendisyonan sa bloc voting sa relihiyusong kahugpongan. Suod sang Presidente Aquino ang bag-ong liderato sa INC apan di mahitabo nga iyang pasagdan si de Lima, nga giingong mao untay orihinal nga napilian pagka chief justice sa Korte Suprema apan nabulilyaso lang sa Judicial and Bar Council (JBC) ug karon padaganon pagka senador.
Mahimo hinuong mausab pang ilang baruganan, agad sa paling sa sentimento sa kinabag-an. Tungod ug alang sa piniliayng labihan pang layoa.
- Latest
