Papating ni Noynoy

Usa sa kapilian ni Presidente Noynoy Aquino sa padayon niyang kaapiki atubangan sa nisulbong nga kasuko ug pagbangotan sa kamatayon sa 44 ka sakop sa Special Action Force atol sa engkuwentro sa Mamasapano, Maguindanao mao ang pagpapating: Di niya ipasabot ang kuwestiyonable nga mga sirkumstansiya nga naglibot sa Oplan Exodus, di siya moangkon og responsibilidad ni mangayo og pasaylo sa iyang papel sa nabulilyaso nga operasyon.

Kapin na sa buwan human sa trahedya, nagpabiling taas ang garbo ug gahi ang ulo ni Aquino. Nga atubangan sa pagsalikway sa kinabag-an sa katawhan sa mga awhag sa people power ug kudeta batok sa iyang pamunoan mahimong iyang paundayonan.

***

Bisan nabantang na nga iyang gitugotan si Direktor Heneral Alan Purisima, ang ni-resign nga hepe sa Philippine National Police, sa pagpadayon pagduma sa Oplan Exodus bisan gipaubos na og preventive suspension ni Ombudsman Conchita Carpio-Morales tungod sa giatubang nga kasong pagpangawkaw, nagpadayon si Aquino pagdumili pagbakwi sa nahauna niyang pamahayag nga igo lang nihubad sa jargons si Purisima.

Bisan nabisto na nga si Purisima ang nimando ni Direktor Getulio Napenas, ang girelibohang hepe sa SAF paglusad sa operasyon niadtong Enero 25, kapin sa buwan human nagsugod ang iyang suspenso niadtong Disyembre 4, nagdumili gihapon si Aquino pagbakwi sa iyang mga pasidungog sa suod niyang higala.

***

Nisamot kadako ang tentasyon ni Aquino sa pagpapating kay ang sibaw nga awhag pagpalagpot niya sa katungdanan kutob ra sa militanteng mga pundok, nga nangampanya na batok niya bisan wa pa kalingkod sa Malakanyang, ug sa iyang politikanhong mga kaatbang, nga gilambigit sa mas dagkong kahiwian ug pangabuso sa sila pay nagtungkawo sa gahom.

Mahimong makapasamot sa kagahi ni Aquino ang hingpit niyang pagkontrolar sa militar ug kapolisan. Ang masuk-anong protesta sa pipila ka opisyal sa SAF batok niya wa dasoni sa kinabag-an sa mga heneral ug mga polis ug mga sundawo nga pabiling nagpaluyo sa commander in chief.

***

Apan dakong sayop ang pagsalikway ni Aquino sa panginahanglan pagkumpisal sa katawhan sa kinatibuk-an niyang atraso sa Mamasapano. Wa siyay kalainan ni kanhi presidente Gloria Arroyo nga nagpaugat sa pagpalingug-lingog sa daghan ug dagko uyamot nga mga eskandalo nga gipasangil batok niya pinaagi sa pagpanghudlat nga mas kabalak-an ang katakos ug kaligdong sa bise presidente nga mopuli niya.

Nahibawo nang katawhan sa kasaypanan ni Aquino. Tanang timaan nagmatuod nga napasaylo na nila siya. Maong wa gyoy angayng kabalak-an kon moangkon og responsibilidad ug mangayo og pasaylo. Mas dako hinuon ang iyang gimbuhaton pagtino nga di na masubli ang bulilyaso, nga kahatagan og hustisya ang nangamatay nga SAF commandos ug nga kasilotan ang mga sakop sa Moro Islamic Liberation Front (MILF) ug ubang pundok nga niluba sa SAF.

[email protected].