Dakong atraso ni Noynoy
Gipaabot nga mahingpit na karong semanaha ang imbestigasyon sa Board of Inquiry sa Philippine National Police sa duguong engkuwentro sa Mamasapano sa Maguindanao. Ang resulta sa imbestigasyon maoy gipaabot ni Presidente Noynoy Aquino aron mobutyag sa kinatibuk-an nga panghitabo nga nisangpot sa kamatayon sa 44 ka sakop sa Special Action Force.
Sibaw ang awhag nga mosulti na sa tinuod ug moangkon na og responsibilidad sa trahedya ang presidente kay naklaro nang mga panghitabo bisan wa pa mahuman ang BOI. Apan alang ni Aquino nga nihatag og dakong importansiya sa pagpalig-on sa mga institusyon, aron nga magpadayon ang gipasiugdahang kausaban bisan wa na siya sa gahom, kinahanglang hingpiton ang proseso.
***
Bisan sa iyang pagbalikbalik pagpasabot sa kamahinungdanon sa paghingpit sa opisyal nga imbestigasyon una moumol sa bisan unsang baruganan ug motulisok ni bisan kinsa, si Presidente Aquino nihimo na og mga pamahayag pinasikad sa pasiuna niyang pakisusi sa Oplan Exodus.
Ang daotang balita alang ni Aquino, ug posibleng mao ni nakapalisod ug nakapadugay sa iyang pagtug-an sa tanang detalye, mao nga duna siyay mga pangangkon sa unang duha niya ka mensahe sa nasud labot sa operasyon, nga nisukwahi sa mga nakaplagan sa mga imbestigador sa BOI ug sa mga senador. Alang sa presidente nga ang usa sa labing dakong alas mao ang kaligdong, di makaayo nga masakpan nga namakak.
***
Nabantang na sa katawhan nga namakak si Aquino sa iyang pag-insistir nga si Direktor Heneral Alan Purisima, ang ni-resign nga hepe sa PNP, nihunong pagduma sa operasyon dihang gisuspenso sa Ombudsman niadtong Disyembre 4 ug igo na lang nitambag niya ug nihatag og dugang kasayuran mahitungod sa duha ka gikaintapang terorista nga silang Zulkifli bin Hir alyas Marwan ug Abdul Basit Usman.
Si Direktor Getulio Napenas, ang girelibohang hepe sa SAF, kinsa sa sinugdanan niangkon og hingpit nga responsibilidad sa trahedya, sa kapulihay nitumbok nang Purisima nga maoy tinuod nga tagduma sa operasyon.
***
Lisod alang ni Aquino, tungod sa talagsaon nilang kasuod, ang pagtulisok ni Purisima sa pagsabotahe sa iyang kamandoan pagpakiglambigit daan sa militar ug pagpahibawo sa bag-ong liderato sa PNP ug paghatag niya og sayop nga kasayuran sa kaapiki sa SAF commandos. Apan kinahanglan ni niyang himuon aron pagpanagang sa mas seryusong pasangil nga gipasagdan niyang masaker sa SAF commandos kay gipalabi niyang sabutsabot sa kalinaw uban sa Moro Islamic Liberation Front.
Labing lisod nga ipasabot nganong gisukwahi ang iyang kaugalingong determinasyon pagpalig-on sa mga institusyon. Ang pabilo nganong nalaktawan ug nabutaan ang mga institusyon sa militar ug kapolisan, nga apil sa labing natay-og sa nitumaw nga krisis, mao ang pagtugyan ni Aquino sa operasyon ngadto sa iyang sinaligan bisan suspendido sa katungdanan.
- Latest
