Napasagdang relief goods
Daghang magamit nga lusot ang Kapitolyo sa kawat sa relief goods sa Cebu International Convention Center (CICC)—di ila ang relief goods nga nawagtang, ang bahin nga gikawatan gipagamit nila sa Gawad Kalinga (GK), ang GK maoy nagduma sa seguridad sa gikawat nga relief goods ug ang GK maoy nanguha sa mga boluntaryo nga gidudahang niunay pagpangawat—apan gipili ni Bise Gobernador Agnes Magpale ang pagpangayo og pasaylo.
Inay modason sa pagpanghunaw sa eskandalo, isog si Magpale nga niangkon og responsibilidad. Inay moapil sa pagpanulisok, giluwatan niya ang labing tukma nga awhag human sa kawat—pahugtan ang seguridad sa CICC ug sa tanang relief goods nga gitipigan pa didto.
***
Di kasarangang krimen ang pagpangawat sa relief goods kay dako ning pagbudhi sa pagsalig sa mga nihatag sa hinabang ug bangis nga paghikaw sa mga biktima sa bagyong Yolanda nga labing nagkinahanglan. Maong may sukaranan ang mosunod nga mga pangutana:
•Nahitabo ang kawat niadtong Hulyo 18 ug giangkon sa GK nga may nahitabong kawat niadtong Hulyo 24, apan nganong niadto pa mang Huwebes, Hulyo 31, gipa-blotter ang kawat sa kapolisan sa Mandaue?; ug
•Human nabutyag ang kawat, unsa na may gihimo sa Kapitolyo pagdugang sa seguridad sa CICC ug sa nahibiling relief goods?
***
May guwardiya bang gidestino ang Kapitolyo pagbantay sa ilang kaugalingong relief goods nga hangtod karon gitipigan pa sa CICC? Duna gyud tingali kay wa man mahilabti ang ilang relief goods nga mas mahalon kay sa ginamit nga mga sinina sa GK, sama sa sinakong bugas, binotelyang tubig, bags ug mga tolda.
Angay hinuong imbestigahon ang guwardiya nga nagbantay sa relief goods sa Kapitolyo gikan sa alas-8 hangtod sa tungang gabii sa Hulyo 18. Labaw sa CCTV footage nga uwahi nang nasubli, siya ang nakabantay ug nakabaraw unta dayon sa kawat. Kay ang iyang nahimutangan atbang ra sa GK, kansang relief goods bantang kaayo niya kay pulos samin ang bungbong.
***
Mas kasaligang seguridad sa relief goods sa Department of Social Welfare and Development sa parking area sa CICC pila ka metro gikan sa GK. Gawas sa mga boluntaryo, may unipormadong guwardiya ug regular nga mga kawani. Nahasol hinuon kong nagtan-aw sa kaliboan ka sakong NFA rice nga gitipigan sa CICC. Pila na man ka buwang natanggong? Di ba kaha mas kapuslan kun ipabaha una sa kamerkadohan atubangan sa kanihit ug kamahal sa commercial rice?
Nalilian sab nako nga ang bugas nagaling niadto pang Abril ug Mayo 2013. Tulo ngadto sa unom ka buwan rang lahutay sa bugas humay. Kun maayong pundohanan, mahimong maabtan og tuig. Hinaut maapud-apod sa labing daling panahon kay hagbay rang nabahaw ang bugas. Gawas nga lain na’g baho gisugdan nag kitkit sa mga ilaga.
- Latest
