Lapok na lay dag-anan
Wa pa gani mapagawas sa Department of Justice ang kontrobersiyal nga affidavit ni Janet Lim Napoles, ang gipasanginlang utok sa P10 bilyones nga pork barrel scandal, nisiwil nang sidsid sa iyang depensa: Kumbinsihon nila ang prosekusyon nga kon di siya ang least guilty, di sab si Napoles ang most guilty busa way babag ang paghimo niyang state witness.
Matod sa abogado ni Napoles nga si Bruce Rivera may laing mastermind sa eskandalo. Wa siyay gihisgutan nga ngan apan nakapasibaw sa huhungihong nga ang iduot ni Napoles mao si kanhi presidente Gloria Arroyo. Nagtuo tingali si Napoles nga ang pagkabayo sa kasilag sa Malakanyang ni Arroyo maoy makapahaw-as niya gikan sa lawom nga gahong.
***
Nangagpas ang pipila ka eksperto sa balaod nga nitanyag si Napoles paghatag og dugang kasayuran sa mga transaksiyon nga iyang gisudlan aron kaibanan ang bug-at nga sentensiya nga iyang giatubang. Apan mga nasuhito sa kamat-an ni Napoles nagtuo nga nangambisyon gyod siya sa hingpit nga paglingkawas.
Bisan unsa pay tuyo, ang labing dakong problema ni Napoles mao nga wa nay motuo niya. Human tungloha nga namakak sa taphaw niyang mga tubag sa mga pangutana sa mga sakop sa Senate Blue Ribbon Committee, mas daghang nisalikway nga gimilagrohan siya maong nikalit lang paggakos sa kamatuoran.
***
Atubangan sa mga pasangil nga gamiton sa Malakanyang si Napoles pagguba sa tanang mangahas pagdagan batok sa administrasyon sa piniliayng presidensiyal sa 2016, nipasalig si Presidente Noynoy Aquino nga ipagawas nila ang tibuok listahan sa mga nahilambigit sa eskandalo. Ma-alyado o ma-kaatbang, kon may igong mga ebidensiya, taralon gyod sa hukmanan aron mapahamtangan sa kinatibuk-ang puwersa sa balaod.
Maayo hinuong panaminan ang sulti sa katiguwangan: Nga kon ang pagbuhat sama pa lang kasayon sa pagsulti, ang tanang payag kastilyo na karon. Gawas pa, sa kataposan nakong pakisusi, wa pa maapil silang Aquino ug ang mga naglibot niya sa Malakanyang sa canonization rites sa Vatican karong Dominggo.
***
Sa pikas nga bahin, di sab ta angayng molayat ug motuo dayon ni bisan kinsa nga mangangkon nga nahatagan og kopya sa listahan ni Napoles sa kapin sa gatos ka opisyal sa gobyerno atol sa nagsunod nga pamunoan nilang Arroyo ug Aquino nga pulos nakabahin sa dakong kawat.
Napamatud-an sa makadaghan na uyamot nga mga higayon nga ang mga balhibuon og kamot, nga di nang kapanalipod sa ilang kaugalingon, maningkamot na lang pagkumot sa tanang lapok nga makuptan gikan sa huyong-huyong nga ilang nalubngan. Aron ipanglabay ngadto sa tanang naglibot ug namasangil nila. Uban ang panghinaot nga kon magkabulingit na ang tanan, pul-an ug maglibog ang katawhan ug maglisod na sa pag-ila kinsa ang tinuod nga kawatan.
***
- Latest
