Nagkita na gyud

CEBU, Philippines - Mapasamalaton ang managhigugmaay  nga sila si James Yap ug Michela Corozzo ngadto sa Queen of All Media nga si Kris Aquino ug sa anak niini nga si Bimby Aquino tungod kay mibisita gyud sila aron makahimamat sa ilang anak. Malipayon nga nagbinayloay og post ug mga litrato sila si Michela ug Kris sa Instagram tungod kay nagkita na gyud sila niini.

Pangandoy nga natuman

Aduna’y bag-ong gigama nga kanta ang  ASAP singer nga si Daryl Ong kung diin kauban niya ang iyang  OPM Idols nga sila si Jay-R, Kris Lawrence, ug ang award-winning nga kompositor nga si Vehnee Saturno. Dream come true alang kang Daryl ang maong oportunidad nga makauban ang iyang mga gi-idolo sa industriya.

Posibling magkadayon

Usa sa mga damgo sa Kapuso aktor nga si Rocco Nacino nga makapares niya  ang aktres nga si Sanya Lopez sa usa ka show puhon. Init ang ilang tandem sa set gumikan kay na-link sila sa usa’g usa. Ang duha magkauban sa pantaserye  nga Encantadia kung diin daghan sa ilang mga kauban ang kiligon kung sila ang hisgotan. Gisaysay sa aktor nga managhigala lang sila ug kanunay nga magkaistorya kung bakante sila sa taping. Dugang pa niya nga andam usab siya sa mga posibilidad nga magkadayon sila sa aktres. “Let’s see.  Ang doors ko naman laging bukas when it comes to that”, suma pa ni Rocco.

Nagdaginot

Giangkon sa Kapamilya aktres nga si Isabelle Daza nga nagdaginot siya sa ilang pagpakasal sa iyang French fiancé nga si Adrien Semblat ngadto sa Italy sa miaging buwan. Matud pa niya daghan siya og nakat-onan sa pagpangandam sa kaminyoon sa laing nasud. Diskarte pud niya nga kinahanglan nga adunay papel ang iyang mga higala aron mas makadaginot  sa mga gastohonon. Niabag gyud kaniya sa preparasyon ang iyang mga higala nga sila si Anne Curtis, Erwan Heusaff, Raymund Guttierrez, Liz Uy, Bea Soriano ug Georgina Wilson.

Goodbye Vivoree!

Na-evict sa PBB house ang pambato sa Bohol nga si Vivoree Esclito human makakuha og 17.42% nga mao’y pinakagamay og puntos sa text votes . Silang tulo ni Kisses Delavin ug Yong Muhajil ang mga nominado sa elimination round  human mapildi sa challenge nga gihagit ni Kuya ngadto sa teen housemates.

Proud nga anak

Mapasigarbohong mi-post si  Grae Fernandez sa iyang post sa Instagram  account nga “Son of Mark Anthony Fernandez, Grae, on how he plans to enjoy tonight's party: Makasama 'yung mga kapwa ko artista.#StarMagicBall2016” nga aduna pa’y pakapin nga litrato niya sa maong event. Matud pa niya nga gituyo niya kini aron dili na hukman pag-ayo ang iyang amahan nga kasamtangang natanggong karon sa prisohan.

Destinasyon sa kinabuhi

Aminado si Jessy Mendiola nga duna’y igong rason ang nagkalawom nga  pag-ilhanay nila ni Luis Manzano sa usag-usa. Una na nga gipadayag ni Jessy sa miaging semana nga okay lang niya nga si Luis mao ang lalaki nga makauban niya sa altar sa kaminyoon. “That’s the reason why we’re letting everything fall into place beyond the right path that's supposed to lead us”, suma pa ni Jessy.

Nanguyab sa ka-loveteam?

Pipila pa lang ka adlaw human makumpirmar  ang panagbuwag nila ni Elmo Magalona ug Janine Gutierrez, nitumaw dayon ang  tsismis nga matud pa  nanguyab ang aktor  sa iyang on-screen partner nga si Janella Salvador. Gilimod ni Elmo ang maong isyu gumikan  kay managhigala ug katrabaho ang ilang pagtan-aw sa usa’g- usa. Malipayon usab ang aktor gumikan kay mipaso siya sa labing unang higayon sa red carpet sa Star Magic Ball nga kauban si Janella.

Likod sa kamera

Ubay-ubay ang  nakuryuso kung unsa si Max Collins kung wala siya atubangan sa  camera. Gibutyag ni Max  ang iyang pagkatawo pinaagi  sa usa ka magazine kung diin usa siya sa mga na cover girl niini. "I’m such a dork. I’m really simple and it’s really easy to make me happy. I have an extroverted personality when I’m working, but when I’m by myself, I’m an introvert", suma pa ni Max.

Hugyaw nga Star Magic Ball 2016

Glamoroso  ug mabulukon ang  bag-ohay lang nga Star Magic Ball ug nagbaha ang engrande nga mga outfit sa Kapamilya stars. 

Ang ilang gipanul-ob   mugna  sa mga banggiitan ug mga inila nga mga designer sa nasud sama nila Francis Libiran, Michael Cinco, Val Taguba, Pepsi Herrera, Mark, Bumgarmers, Michael Leyva, Jo Rubio, Edwin Tan, ug uban pa.

Nahitabo ang maong  glamorosong kalihokan niadtong Sabado sa gabii sa Makati Shangri-La Hotel.

Dungan gyud nga miabot ug mipaso sa red carpet ang mga sikat nga loveteam sama nila ni  Enrique Gil ug Liza Sobrano (LizQuen), Kim Chiu ug Xian Lim (KimX)i, Richard ug Maricar, Tommy Esguerra ug Miho Nishida (ToMiho),  Daniel Matsunaga ug Erich Gonzales (DanRich), Kim ug Echo, Bailey May ug Ylona Garcia (BaiLona), McCoy de Leon ug Elisse Joson (McLisse), Elmo Magalona ug Janella Salvador (ElNella), Nash Aguas ug Alexia Ilacad (NLex)  ug uban pa.

Mipatim-aw usab ang gidungog nga nagbalik nga sila si Bea Alonzo ug Gerard Anderson.  Wala pud nagpaulahi sila si  Jessy Mendiola, Luis Manzano ug  Dawn Zulueta .

Aduna pu’y nag-inusara lang nga nitambong sa maong kalihukan, kini  sama ni Queen Mother Karla Estrada, Zanjoe Marudo, Shaina Magdayao,  John Lloyd Cruz , Piolo Pascual ug Maja Salvador.

Wala pud  nagpaulahi ang Chief Content Officer nga  si Charo Santos-Concio ug ang ABS-CBN President nga si Carlo Katigbak.  Si Gretchen Follido ang nahimong host sa maong panghitabo.

Niadtong gabhiona, nakadaug isip Best Dressed Female Award si Liza Soberano ug Best Dressed Male Award usab si Zanjoe Marudo.

Si Elisse Joson ang napilian isip Pond’s Beautified Belle of the Night.

Ang usa sa mga highlight sa maong party mao ang pagpili sa Couple of the Night. Sila si  Sofia Andres ug Diego Loyzaga ang nakalangkat sa maong titulo.

Nagmaya  ang mga nitambong niini  ilabi na kadtong una pa nga nisalmot sa maong prestihiyosong kalihokan . Duna’y natapok  nga donasyon sa maong kalihukan ug ihatag kini sa  Lingkod Kapamilya alang sa mga biktima sa Bagyong Lawin.  (BANAT NEWS)