Pusher todas sa barilan

BULACAN, Philippines - Bulagta ang 46-anyos na sinasabing drug pusher na unang sumuko sa pulisya dahil nasa barangay drug watchlist matapos itong makipagbarilan sa mga pulis habang isinisilbi ang search warrant sa kanyang bahay sa Barangay Mojon, Malolos City, Bulacan noong Biyernes ng gabi. Kinilala ang napatay na si Joel “Suman/Benoy” Mapa ng Menzyland Subdivision sa nasabing barangay. Base sa ulat na nakarating kay P/Supt. Heryl Bruno, isisilbi sana ang search warrant na inisyu ni Judge Crisostomo Dañguilan ng Malolos City RTC Branch 21 laban kay alyas Suman at Benoy dahil sa arms cache at droga nang kumasa ito at makipagbarilan sa tropa ni P/Insp.Reden Baldovino. Narekober ng mga tauhan ng Scene of the Crime Operatives (SOCO) sa crime scene ang isang cal.38 revolver na may mga bala nito, kalahating brick ng pinatuyong dahon ng marijuana at 14-plastic sachet na shabu.