Ang repleksyolohiya (3)

Ania ang ikatulo nga sumpay sa isyu nga atong gihisgotan, pagpangita sa pressure points sa atong kalawasan.

(2) Sa Kamot — Ibukhad ang tudlo ug ang kumagko, diin taliwa sa mga punoan niini, naa sab nahimutang ang pressure points sa stress ug kabalaka. Iduot o pindoton sa kumagko ang likud nga bahin sa kamot samtang ang tudlo moalkontra sa presyur sa sulod nga bahin sa palad, ingon sa gaipit sa pressure points sa kamot, sulod sa tres minutos, unya moginhawa’g lawom nga igo nga makaabot sa tiyan. Mabatyagan nga momenus ang stress, nga ang tensyon mokalma sa tanang lebel sa lawas, hunahuna ug emosyon.

(3) Sa Abaga — Ang pressure points sa abaga, anaa nahimutang sa tunga o tunga-tunga sa abaga ug sa pundasyon sa liog. Ilawom sa humokon nga tisyu niini, ipresyur o iduot sa tudlo sulod sa tres minutos aron pag-alibyo o pagmenus sa stress o kabalaka. Segun sa TCM (traditional chinese medicine) principles, makatabang sab kini sa pagpabaha sa ‘Qi energy’ sa katibuk-ang sistema sa ‘meridians’ nga nakahanig sa mga kuryente nga paandaron aron mabalanse ang kabaskog sa lawas. Kun sa paminaw mo, nabug-atan ka sa subra nga panghunahuna o na-stress, kining dapita sa pressure points maoy pisilon aron mabalanse ang pag-aninaw sa kinabuhi pinaagi sa lawas.

(4) Sa Ilokan — Ilawom sa ilokan, mga duha ka tudlo ang gilapdon gikan niini, paubos kilid sa dughan, naa sab nahimutang sa humokon nga tisyu ang pressure points nga kun iduot sa tudlo sa igo nga kusog nga dili palabihan, unya moginhawa’g lawom sulod sa 2-3 ka minutos. Mopanormal kini sa sirkulasyon sa dugo ug makatabang sa pagpaus-os sa stress ug kabalaka. Maingon man makaabag sa pagbalanse sa emosyon.