Mama gipatay sa anak

CEBU, Philippines - Nabuak ang ulo ug daghang bun-og sa nawong ang naangkon sa 74-anyos nga inahan human kini giparok sa semento sa iyang 40-anyos nga anak nga dunay problema sa pangisip sa Bantigue, Lungsod sa Bantayan pasado alas 9 sa nakalabay nga gabii.

Ang imbestigador sa Bantayan Police Station, Police Officer 1 Rex Bose, niingon nga atol sa ilang pagresponde sa maong hitabo ila una nga nakita ang dugo nga nagbanaw sa biranda sa balay diin nahitabo ang krimen.

Ang inahan usa ka retiradong maestra, biyuda ug nagpuyo sa ilang balay kauban ang suspetsadong anak.

Sumala pa ni Bose nga ang duha nagpuyo sa ilang balay human naminyo na sab ang uban nila nga igsoon ug ang uban atoa sa Manila.

Matud ni Bose nga nahibaw-an sa mga tawo ang krimen human nigawas sa balay ang anak nga nagkadugo ang kamot ug senina ug niduol sa mga tawo nga nag-praktis og sayaw alang sa Sinulog.

Dihang kini gipangutana kung unsay nahitabo, igo lang nikatawa ug niingon nga iyang giparok sa semento ang iyang inahan.

Si Bose niingon nga grabeng bun-og sa nawong ang naangkon sa inahan ug dunay bahin sa ulo niini ang nabuak hinungdan nga nagbanaw ang dugo sa ilang balay.

Suway pa unta nga gitabang sa mga polis ug medical team ang biktima apan nakabsan gyud kini sa gininhawa.

“Murag dili lang ka usa to niya giparok seguro kay daghan man ang samad sa nawong ug ulo, didto sa biranda niya gipatay grabe kaayo ang damage sa ulo,” asoy ni Bose.

Sigun pa ni Bose nga dugay na nga dunay problema sa pangisip ang suspetsadong anak apan sigun pa sa mga anak nga dili kini bayolente sa ilang mga silingan ug bugtong ang inahan ra nila ang iyang hilabtan ilabi na kung duna kini pangayuon nga dili mahatag.

Sa pagkakaron temporaryo una nga gikostudiya sa buhatan sa kapolisan ang anak.

Si Bose nitug-an nga gusto sa mga igsuon sa suspek nga ipasulod sa mental hospital ang suspetsado apan gipasabot ni Bose nga ila pasakaan og kasong parricide ang anak ug bahala na ang korte nga modeterminar sa tulubagon niini.

“SOP (standard operating procedure) man namo na sir nga kung naay krimen especially patay ra ba ang victim i-file namo ang kaso, korte na ang bahala dayon,” pasabot pa ni Bose. (BANAT NEWS)