Makanselar untang Sinulog
Kun natino pa sa kapolisan ug militar nga nagplano ang mga terorista sa pagbomba ug aktuwal nga nihimo og mga lakang sa pagpasakit sa mga sibilyan sa nagkalainlaing kalihokan sa Piyesta Senyor sa Sugbo, ipakanselar gyod unta ni Cebu City Mayor Tommy Osmena ang Sinulog Grand Parade niadtong Dominggo.
Matud ni Cebu City Councilor Dave Tumulak giisip ni Osmeña nga seryusong hulga ang pagpamomba sa Plaza Rizal sa Hilongos, Leyte duha ka semana sa wa pang Piyesta Senyor. Labing gikahadlokan ni Osmeña nga ang mga responsable wa mopuntirya sa mga instalasyon sa kapolisan, militar o gobyerno kon dili niigo gyod sa mga sibilyan.
***
Gibutyag ni Tumulak sa Arangkada sa DYAB Abante Pa, Bisaya! nga may namatikdan ang mga eksperto sa bomba sa militar nga gipakatap sa palibot sa Basilica Minore del Sto. Niño nga presensiya sa kadudahang mga tawo nga nisal-ot sa kaliboan ka deboto nga nagsud-gawas sa Pilgrim Center.
Nagtuo si Tumulak nga ang kaalerto sa kapolisan ug militar maoy nakaaghat sa mga terorista sa di pagdayon sa bisan unsa nilang plano. Kumbinsido sab siya nga dako ang papel ni Senyor Sto. Niño sa pagpuypoy sa ilang mga kasingkasing mao nga wa na lang mangahas sa pagpanamastamas sa inosente nga mga deboto.
***
Kabalaka sa seguridad ang usa sa nakaaghat sa mga tigpasiugda sa pag-usab sa sistema sa Sinulog Grand Parade--inay molibot sa tibuok ruta, ang tanang nangapil nagsugod sa Carreta ug natapos sa Cebu City Sports Center.
Matod ni Tumulak natingob nang ilang pagbantay sa duha na lang ka dan nga giagian sa parada, ang Maxilom Ave. ug Osmeña Blvd. Mas luwas sab alang sa dancing contingents, labi na sa mga bata, nga wa maabti og ngitngit sa kadalanan nga daghan nang hubog.
***
Manglingkod ang mga tigpasiugda aron pagtuki sa mga pagtulon-an sa kinatibuk-ang kalihokan. Gihangop ni Tumulak ang sugyot ni Osmeña sa pagpahamtang og liquor ban aron mabadlong nang panglawgaw sa Maxilom ug kasilinganang kadalanan.
Nikumpisal hinuon si Tumulak nga supak siya nga sa sunod Piyesta Senyor pawngon na sang cell sites. Angayng pahinumdoman si PRO 7 Chief Noli Talino nga polis siya, di switcher sa telcos.
- Latest
