Unsay katungod sa bata nga gisagop?

Dear Atty.Divine,

Maayong adlaw kanimo attorney. Ang akong concern mao ang kabahin sa katungod sa usa ka adopted child. Mahimo ra ba nga wala siya’y adoption papers pero sa birth certificate niya kay ang parents name nga nakabutang mao ang mga nag- adopt na niya. Sa pagkakaron, namatay na ang mga parents niya ug gi-question siya sa mga tinuod nga anak kabahin sa pagbahin-bahin nila sa inheritance kay lagi adopted ra kuno siya. Hinaot nga malamdagan mi nimo sa mga katungod sa usa ka adopted. Sa kanunay, kami nag- sunod sa imong lindog. Daghang salamat ug Viva Pit Senyor nimo Atty. Divine. —Nelia

Dear Nelia,

Ang usa ka adopted nga bata gikonsiderar kana sa atong balaod nga legitimate nga anak sa mga nagsagop kaniya. Sa ato pa, mahimo kining maka-inherit sa tanang kabilin sa mga misagop kaniya sama sa katungod sa matuod nga anak, basta gipaagi sa korte ang pagsagop sa bata. Buot ipasabot nga kinahanglan gyud nga may Adoption Decree o decision sa korte nga nag-aprobar sa Petition for Adoption nga gipasaka sa mga misagop sa bata. Apan base sa imong suwat, wa’y adoption papers ang bata ug sa iyang Birth Certificate gibutang lang ang pangalan sa mga nagsagop kaniya nga maoy mga ginikanan. Mao na ang gitawag og “Simulation of Birth” nga usa ka kalapasan sa balaod ug kini dili maoy husto nga paagi sa pagsagop.

Sa ato pa, kay wa man siya’y adoption papers, then mahimo gyud nga kuwestyonon ang iyang katungod sa pag-inherit sa kabilin sa mga nagsagop kaniya ug kay wa man siya’y adoption papers nga ikapakita  og busa dili gyud siya maka-insister sa pagpangayo og bahin. Ang maayo niyang buhaton mao na lang ang paghangyo sa mga matuod nga anak sa nagsagop kaniya nga bahinan siya bisan gamay sa kabilin sa mga tawo nga iyang gikonsiderar nga matuod niya nga mga ginikanan. Thanks and God Bless.- Atty. Divine

Alang sa inyong pangutana, ipadala lang sa Legal Corner sa Banat News sa V. Gullas St., Cebu City or email sa [email protected] ug akong tubagon ang inyong pangutana pinaagi sa akong column matag Miyerkules, Sabado ug Domingo.