70 sikop sa Oplan Pokemon

CEBU, Philippines - Sikop ang 70 ka tawo atol sa Oplan Pokemon, One Time Big Time sa Chinese Cemetery sa Carreta, Dakbayan sa Sugbo kagahapon sa hapon.

Kini hiniusa nga operasyon sa Philippine Drug Enforcement Agency, City Intelligence Branch ug Investigation and Detection Management Bureau sa Cebu City Police Office.

Sa mga nadakpan, mokabat sa 10 ang giingong nalambigit sa ilegal nga drugas samtang susihon pa ang kaso sa uban.

Usa sa nadakpan mao si Glorieta Punsala kinsa mabdos ug nakuhaan og usa ka gamay nga pakete sa shabu ug lima ka video karera machines.

Matud pa nga usa pa ka semana namaligya ang suspek og shabu tungod kay naglisud sa pagbuhi sa iyang mga anak.

Na-rescue sab ang walo ka minor de edad nga diha sa dalan atol sa operasyon.

Nasakmit atol sa operasyon ang tulo ka armas ug 19 ka video karera machines.

Gikalipay ni PDEA-7 Assistant Director Melvin Eatoque ang dako nga natabang sa kapolisan sa maong operasyon.

Samtang kapin sa P800 mil nga kantidad sa shabu ang nasakmit ug upat ka tawo ang nasikop sa mga sakop sa PDEA-7 sa managlahing buy-bust operation nga ilang gihimo sa Dakbayan sa Sugbo sa nakalabay nga gabii.

Pasado alas 6 sa gabii nadakpan ang manag-uyab sa Tres de Abril, Labangon nga sila si Jochep Comendero alyas Francis ug Antet, 22, ug Ana Grace Villarin, 20.

Gisignit sa mga operatiba ang duha human nakatunol og gituohang shabu ang lalaki nga nitimbang og 50 gramos nga nagkantidad og P150,000.

Gawas sa napalit nga shabu narekober gikan sa duha ang laing putos sa gituohang shabu nga nitimbang og 200 gramos nga nagkantidad og P600, 000.

Samtang pasado alas 11 sa gabii duha sab ka lalaki ang nadakpan sa A. Lopez Street, Labangon nga sila si Reynante Gonzalez, 35, ug Kirk Perocilo, 33, nagpuyo sa maong dapit.

Gamit ang buy-bust boodle money nga P150,000 nakapalit og 50 gramos nga shabu ang asset sa PDEA-7 hinungdan nga gipangpusasan ang duha ug gipangbalhug na sa prisohan.

Ang upat nga nahinabi sa mga tigbalita pareho nga nilimod sa pasangil nga ilang giatubang.

Samtang ang PDEA-7 nakasikop og upat ka tawo sa Dakbayan sa Tagbilaran, Bohol nga sila si Michael Naquilla alyas Opaw, Ariel Abanto, Jovanni Seloterio ug Policarpio Jagunos, mga trabahante sa barangay.

Nakuha gikan sa mga dinakpan ang drugas, kagamitan sa pagsuyop, cellphone ug uban pa.

Matud ni Leia Albiar, tigpamaba sa PDEA-7, nga dul-an sa usa ka semana ang pagpahigayon nila sa pagpaniid sa mga binuhatan sa mga dinakpan. Jojo C. Ugdol ug Rowena D. Capistrano (BANAT NEWS)