Amahan sa drayber sa ‘wanted’ nga konsehal patay
CEBU, Philippines - Gibanhigan patay ang 61-anyos nga lalaki samtang nagmaneho sa iyang awto sa Camella Homes, Lawaan I, Dakbayan sa Talisay gikan naghatud sa iyang mga apo sa eskwelahan kagahapon sa buntag.
Ang biktima giila nga si Manuel Canangcaan, amahan ni Adhman Canangcaan kinsa drayber ni Konsehal Felix Abacajan Jr. sa Barangay Maghaway.
Si PO3 Arthur Santillan sa Talisay City Police Station nibutyag nga sakay sa silver gray Honda Civic nga awto nga adunay plaka nga YCR-598 ang biktima dihang gibirahan sa duha ka lalaking nagsakay og motorsiklo samtang nagtungas sa Camella Homes.
Nabuslot ang walang bahin nga samin sa sakyanan agi sa pagpusil ug naigo ang tangkugo sa biktima. Tungod kay tungason ang karsada niatras ang sakyanan ug nidam-ag atubangan sa usa ka tindahan.
Kahinumduman nga si Abacajan ang nakigpinusilay sa mga sakop sa Provincial Intelligence Branch (PIB) sa niaging buwan dihang gi-raid ang iyang panimalay hinungdan nga gipasakaan og kaso kauban ni Adhman.
Si Abacajan giingong bodyguard sa drug lord nga si Franz Sabalones ug tigpayuhot sab og ilegal nga drugas sa ilang lugar.
Nakapiyansa si Adhman kinsa nisumbalik pagkiha sa kapolisan.
Ang amahan una na nga nagpa-blotter sa kapolisan tungod kay adunay nagsige og sunod-sunod kaniya. (BANAT NEWS)
- Latest
