Guidelines sa iisang ‘chain of command’, sa batas trapiko, binalangkas na ng I-ACT
MANILA, Philippines - Upang maiwasan ang kalituhan ng mga motorista, binalangkas ng Inter-Agency Council on Traffic (I-ACT) ang guidelines o panuntunan para sa ilalim ng nag-iisang “chain of command” na lamang sa pagpapatupad ng batas trapiko sa buong Metro Manila.
Ayon sa Metropolitan Manila Development Authority (MMDA), kamakalawa ay nagkaroon sila ng workshop sa Camp Crame, kasama ang local government unit (LGU), Department of Transportation (DOTr), Land Transportation Office (LTO), Land Transportation and Franchising Regulatory Board (LTFRB) at PNP-Highway Patrol Group (PNP-HPG).
Isa sa pangunahing agenda ay kanilang binalangkas ang guidelines o panuntunan na dapat iisa na lamang ang “chain of command” sa pagpapatupad ng batas trapiko.
Ito ay base sa napagpasyahan ng mga Metro mayors hinggil sa nagkakaisang mga ordinansa na may kaugnayan sa multa at karampatang parusa upang hindi malito ang mga motoristang mahuhuli.
Dahil kadalasan aniya ay nalilito ang motorista sa magkakaibang ordinansang pinatutupad ng bawat pamahalaang lokal na may kinalaman sa trapiko.
Kabilang din sa mga pinag-usapan sa workshop ay ang pagpapaigting ng mahigpit na kampanya kontra colorum at illegal parking.
Sa tala ng I-ACT, mula Hulyo 6 hanggang Oktubre 26, 2016, nasa 236 colorum na sasakyan ang kanilang nahuli, 5,696 ang hinatak at nasa 2,330 vendors ang itinaboy at 25, 635 traffic violation tickets ang naisyu ng I-ACT sa mga violator.
Samantala, nakipag-partner naman ang MMDA sa Waze, isang mobile application para makatulong sa mga motoristang maiiwasan ang mga lugar na matrapik.
- Latest