Lacson pumalag sa patutsada ni Maceda
MANILA, Philippines - Pumalag si Sen. Panfilo Lacson sa naging pahayag ni dating Senate President Ernesto Maceda na ang sinumang boboto para sa pag-acquit o pagpapawalang sala kay Chief Justice Renato Corona ay maituturing na pagpapahayag ng suporta kay Vice President Jejomar Binay.
Ayon kay Lacson, maliwanag na pang-iinsulto ang pahayag ni Maceda dahil pinalalabas nito na may ibang dahilan na labas sa impeachment court ang gagawing pagboto ng mga senador na tumatayong judges sa trial ni Corona.
Sinabi ni Lacson na sila ang magdedesisyon kung guilty o hindi ang Punong Mahistrado sa mga iniharap na Articles of Impeachment at ibabatay nila ito sa mga iniharap na ebidensiya.
Ayon kay Lacson, mistulang pinalalabas ni Maceda na lahat na lang ay pulitika ang umiiral sa Pilipinas kahit pa sa mga seryoso at makasaysayang usaping tulad ng impeachment trial kay Corona.
Kaugnay nito, inihayag ni Sen. Koko Pimentel na pang-iintriga lang ang pahayag na ito ni Maceda dahil sa wala itong basehan.
Tiniyak ni Pimentel na hindi makaka-pressure sa kaniya ang naging pahayag ni Maceda kahit na kilala siyang kaalyado ni Binay.
Ayon pa kay Pimentel, hindi naman sila kinakausap ni Binay tungkol sa impeachment ni Corona.
- Latest
- Trending