Bagong mayorya ng Senado di rin magtatagal - Pimentel
Naniniwala si Sen Aquilino Pimentel Jr. na hindi magtatagal at mabubuwag din ang komposisyon ng mayorya ng Senado na nabago nang mapatalsik sa posisyon si Senate President Manny Villar.
Inilarawan ni Pimentel ang bagong mayorya bilang “worst than halo-halo” dahil magkakaiba umano ang paninindigan ng mga ito at magkakaiba ang pinaniniwalaan.
Katulad ng halo-halo, madali anyang mapapanis at matutunaw ang bagong mayorya ngayon na kinabibilangan ng ilang senador mula sa oposisyon at mga senador na kilalang kaalyado ng Malacañang.
Nanindigan din si Pimentel na mananatili siya sa minorya at hindi siya puwedeng umayon kay Senate President Juan Ponce Enrile dahil magkaiba sila sa maraming isyu at posisyon.
Pero nilinaw din ni Pimentel na buo ang suporta niya kay Enrile bagaman at hindi rin mawala sa kanyang isipan na ang bagong pinuno ng Senado ay kaalyado ng Palasyo.
Sinabi ni Pimentel na ayaw niyang matawag na taga-suporta ng Malakanyang.
Samantala, muling nakuha ni Sen. Jose “Jinggoy” Estrada ang kanyang po sisyon bilang Senate Pro-tempore samantalang naluklok naman bilang bagong majority floor leader si Sen. Juan Miguel Zubiri na dating hinahawakan ni Sen. Francis “Kiko” Pangilinan.
Bagaman hindi pa pormal, napapabalitang si Sen. Panfilo Lacson ang hahawak sa accounts ng Senado, samantalang kay Sen. Richard Gordon mapupunta ang Blue Ribbon committee.
Si Sen. Edgardo Angara ang itatalaga sa Finance committee na dating hawak ni Enrile. Si Sen. Loren Legarda naman umano ang itatalaga sa agriculture committee na dating kay Angara.
Inire-reserve naman kay Pimentel ang committee on foreign relations at constitutional amendmends.
Bagaman at kilalang kakampi ng administrayong Arroyo, pormal na nagpahayag kahapon si Sen. Lito Lapid na sasapi sa bagong minorya kabilang na sina Pangilinan, Sen. Alan Peter Cayetano, Sen. Pia Cayetano at Sen. Joker Arroyo.
Maging si Sen. Antonio Trillanes IV ay nagpahayag na mananatili siya sa minorya.
Sa Lunes na posibleng maging pormal ang pagkakatalaga ng mga chairman ng komite at pinaplantsa pa rin ito sa ngayon.
Wala pa namang balita kung anong komite ang ibibigay kay Sen. Manny Villar na hindi sumipot sa sesyon kahapon.
- Latest
- Trending