5 pang mahistrado tetestigo vs Sereno
Nabatid na inimbitahan ng House Justice Committee sina Associate Justices Diosdado Peralta, Lucas Bersamin, Mariano del Castillo Samuel Martires at Andres Reyes, Jr. para sagutin ang mga usaping nakapaloob sa reklamong impeachment ni Atty. Larry Gadon. File
MANILA, Philippines — Lima pang mahistrado ng Korte Suprema ang umano’y handa nang tumestigo sa impeachment proceedings laban kay Supreme Court Chief Justice Maria Lourdes Sereno.
Dahil dito, pumalo na sa 9 na mahistrado ang inaasahang haharap sa witness stand at kung tetestigo lahat sila, mahigit na ito sa mayorya ng mga mahistrado sa Korte Suprema na nasa walo lamang.
Nabatid na inimbitahan ng House Justice Committee sina Associate Justices Diosdado Peralta, Lucas Bersamin, Mariano del Castillo Samuel Martires at Andres Reyes, Jr. para sagutin ang mga usaping nakapaloob sa reklamong impeachment ni Atty. Larry Gadon.
Una nang naimbitahan si Sr. Associate Justice Antonio Carpio para sa January 18 hearing samantalang sumalang na sa witness stand sina Associate Justices Teresita Leonardo de Castro, Francis Jardeleza at Noel Tijam gayundin si retired Associate Justice Arturo Brion.
Samantala, deadma si Albay Rep. Edcel Lagman sa patutsada ni Atty. Larry Gadon na magbitiw na siya sa kanyang puwesto.
Ito’y matapos siyang akusahan ni Gadon na nag-aabogado kay Chief Justice Maria Lourdes Sereno na aniya’y labag sa tungkulin nito bilang kinatawan. Ayaw ding patulan ng mga kasamahan ni Lagman sa Magnificent 7 sa Kamara si Gadon.
- Latest
