Roque sasakay sa MRT-3, hirap ng commuters susubukan

MANILA, Philippines — Siniguro kahapon ni Presidential Spokesman Harry Roque na nakahanda siyang sumakay sa MRT 3 minsan sa isang linggo sa pagpasok niya sa Malacanang upang maramdaman niya ang hirap ng mga MRT commuters.

Sinabi ni Sec. Roque sa media briefing sa Malacanang, nais niyang maranasan ang hirap ng mga mananakay ng MRT 3 upang personal niyang ipaabot sa MRT at DOTr ang problema ng mga commuters.

“I might take MRT3 ‘once a week,’ to personally complain to MRT personnel about problems I’ll encounter,” wika pa ni Sec. Roque sa Malacanang reporters.

Aniya, siniguro din ni DOTr Sec. Arthur Tugade na kukuha ng reliable na maintenance provider ang MRT upang resolbahin ang mga problema nito.

“Tugade knows we are crying for a quick solution to MRT woes; DOTr is taking all legal steps. Full rehabilitation is needed for MRT-3,” dagdag pa ng presidential spokesman.

Magugunita na inulan ng pagbatikos ang MRT dahil sa sunod-sunod nitong pagkasira at ang pagkalas ng bagon nito bukod sa aksidente kung saan ay naputulan ng braso ang nahulog na pasahero sa riles.