Vendor utas sa kapwa vendor
MANILA, Philippines — Pinaniniwalaang matinding selos ang dahilan upang mapatay ang isang vendor ng kapwa nito vendor matapos itong pagbabarilin ng suspek sa Pasig City, kamakalawa ng hapon.
Bumulagta noon din ang biktimang si Carmal Bata, nasa hustong gulang, at vendor sa Pasig Mega Market, sanhi ng mga tama ng bala sa iba’t-ibang bahagi ng katawan. Habang pinaghahanap naman ng pulisya ang mabilis na tumakas na suspek na nakilala lang sa alyas na “Mac-Mac”.
Nabatid na dakong alas-5:40 ng gabi nang maganap ang pamamaril sa ikalawang palapag ng Pasig Mega Market na matatagpuan sa Barangay San Nicolas sa lungsod.
Ayon sa report, nakaupo at nagpapahinga ang biktima nang dumating ang suspek na armado ng hindi pa batid na kalibre ng baril at ilang ulit na pinagbabaril ang walang kalaban-labang biktima at pagkatapos ay mabilis ding tumakas palayo ng lugar
Lumalabas sa imbestigasyon, away sa pag-ibig ang motibo ng krimen dahil nagalit ang suspek sa biktima matapos siyang iwanan ng kanyang dating live-in partner at nakisama sa pinaslang na vendor.
Nagsasagawa pa ng follow up operation ang mga awtoridad para sa ikadarakip ng suspek.
- Latest