DND: Pagtatapos ng Marawi crisis nalalapit sa pagkamatay nina Hapilon, Omar

MANILA, Philippines – Kasunod ng pagkakapaslang sa dalawang taong nasa likod ng kaguluhan sa Marawi City, naniniwala ang Department of National Defense (DND) na malapit na silang magtagumpay.

Kinumpirma ngayong Lunes ni DND Secretary Delfin Lorenzana ang pagkakapaslang ng kanilang pwersa kina Abu Sayyaf leader Isnilon Hapilon at Omar Maute.

"The implication of this is that the end of the Marawi incident is near and we may announce the termination of hostilities in a couple of days," pahayag ni Lorenzana.

Upang lalong makumpirma na sina Hapilon at Maute ang napaslang, magsasagawa ng DNA test ang militar.

BASAHIN: Hapilon, Omar Maute utas sa militar

"They will be subjected to DNA test because several rewards coming from foreign countries and also from us. I think Maute has a P5-million reward on his head. Isnilon has $5-million reward on his head plus another P10 million from the government so that’s huge money," sabi ng kalihim.

Anila, isa sa mga bihag ng teroristang grupo ang nakapagkumpirma na sina Hapilon at Maute ang napaslang.

Samantala, hinahanap pa rin ng mga otoridad ang financier ng Maute group na si Mahmud bin Ahmad na isang Malaysian.

Sinabi ni Lorenzana na bukod sa 17 bihag na nailigtas, may hawak pang 20 ang ISIS-inspired local terror group.